ԵՐԵՎԱՆ, 22 ապրիլի — Sputnik. «Իմ քայլի» պատգամավորն առաջարկում է արտոնություն սահմանել կորոնավիրուսի շրջանում Հայաստանում ներդրումներ անող գործարարների համար: Առաջարկը Բաբկեն Թունյանինն է: Այս մասին նա ասաց այսօր ընթացող ԱԺ արտահերթ նիստում։
ՀՀ Հարկային օրենսգրքում Թունյանն առաջարկում է որոշ փոփոխություն անել ու ներդրումների նպատակով կատարված ծախսերը հարկերից նվազեցնել ոչ թե տարիներ անց, ինչպես նախատեսում է գործող օրենսգիրքը, այլ հենց նույն հարկային տարվա ընթացքում:
«Այդ ժամկետները սահմանված են Հարկային օրենսգրքի 121 հոդվածի 1-ին մասով: Օրինակ` շենքերի և շինությունների ամորտիզացիոն նվազագույն ժամկետը 20 տարի է, արտադրական սարքավորումներինը` 5 տարի և այլն»,- նախագիծը ներկայացնելիս ասաց Թունյանը:
Հարկային օրենսգրքի առաջարկվող փոփոխությունը գործելու է ժամանակավորապես` միայն մինչև 2020 թվականի դեկտեմբերի 31-ը կատարվող ներդրումների համար:
Թունյանի համոզմամբ` այս փոփոխությունը լրացուցիչ խթան կհանդիսանա այն ընկերությունների համար, որոնք մտադրություն ունեին կապիտալ ներդրումներ կատարելու:
Հայաստանի բենզինն աշխարհի նավթի հետ կապ չունի՞. ինչու գնանկումն այստեղ չի հասնում
ՀՀ ԱԺ-ն այսօր ԱԺ երկու պատգամավորների առաջարկով արտահերթ նիստ է գումարել: Պատգամավորները փորձում են իրենց օրենսդրական նախաձեռնություններով մեղմել կորոնավիրուսի հետևանքով առաջացած ճգնաժամի տնտեսական հետևանքները: Օրակարգում երկու նախագիծ է՝ «Իմ քայլը» խմբակցության պատգամավոր Բաբկեն Թունյանի ու «Բարգավաճ Հայաստանի» պատգամավոր Միքայել Մելքումյանի հեղինակածները: Երկուսն էլ լրացումներ են առաջարկում ՀՀ Հարկային օրենսգրքում:
Վանաձորում կա՛մ կորոնավիրուսի թվերը կաճեն, կա՛մ աղքատությունը. պատգամավոր
Նշենք, որ երկու նախագծերի վերջնական ընդունման համար սահմանվել է 24-ժամյա ռեժիմ: Նախագծերի հեղինակները հույս հայտնեցին, որ դրանք հնարավոր կլինի ընդունել այսօրվա ընթացքում: