ԵՐԵՎԱՆ, 21 ապրիլի - Sputnik. ՀՀ արդարադատության նախարարությունն անդրադարձել է «Բաց հասարակության հիմնադրամներ - Հայաստանի» կողմից մի շարք հասարակական կազմակերպությունների և իրավապաշտպանների անունից տարածված հայտարարությանը։
Նախարարության մամուլի խոսնակ Լուսինե Մարտիրոսյանը Facebook-ում կատարած գրառման մեջ այս հայտարարությունն «անբացատրելի» է որակում:
«Այն, ինչ անում ենք, նախատեսված է եղել Դատաիրավական բարեփոխումների ռազմավարությամբ, որն արժանացել է թե՛ միջազգային հանրության, թե՛ քաղաքացիական հասարակության, այդ թվում՝ հայտարարությունում նշված ՀԿ-ների դրական արձագանքին։ Ավելին, Դատական օրենսգրքի կարգավորումները ևս երկար ժամանակ հանրային քննարկում են անցել և նման դիրքորոշում չենք ստացել, հետևաբար այս փուլում նման հայտարարությամբ հանդես գալը չենք կարող բացատրել, թե ինչով է պայմանավորված»,- նշված է ԱՆ հաղորդագրության մեջ:
Լուսինե Մարտիրոսյանը նաև նշում է, որ առաջարկվող կարգավորումները հնարավոր են բացառապես սահմանադրական բարեփոխումների արդյունքում։
Հիշեցնենք՝ «Բաց հասարակության հիմնադրամներ – Հայաստանը» հաղորդագրություն էր տարածել դատավորների նկատմամբ վեթինգի իրականացման գործընթացի վերաբերյալ՝ մեկնաբանելով ԱԺ-ում մարտի 25-ին ընդունված օրինագծերի փաթեթը, որի նպատակն է ապահովել դատավորների, այդ թվում՝ Սահմանադրական դատարանի դատավորի թեկնածուների բարեվարքության ստուգման մեխանիզմները:
Ըստ հայտարարության՝ հեղափոխությունից երկու տարի անց քաղաքական մեծամասնությունը ընդունված օրենսդրական փոփոխություններով հրաժարվում է դատաիրավական մարմիններում որակյալ վեթինգի իրականացման պարտավորության կատարումից և իրականացնելու է միայն ձևական կամ ընտրովի ստուգում:
«Տեղի է ունեցել ակնհայտ նահանջ թավշյա հեղափոխության գլխավոր հասարակական պահանջներից՝ արդարության և արդարադատության հաստատման օրախնդրից»,- գրված է հայտարարության մեջ:
Հայտարարության մեջ նշվում է, որ ընդունված օրենքներով նաև անհավասար վերաբերմունք է դրսևորվելու դատավորների նկատմամբ, քանի որ գույքի ու եկամուտների hայտարարագիր չներկայացնելու կամ սխալ տվյալներ ներկայացնելու համար պատասխանատվություն է սահմանվելու միայն 2017թ․ հունիս ամսից հետո նշանակված դատավորների համար: Իսկ դրանից առաջ կատարված նույն արարքի համար որևէ պատասխանատվություն չի սահմանվել:
«Հակասորոսական պայքարում մեզ հետ արդեն տարբեր երկրներ են համագործակցում». Նարեկ Մալյան
Ընդունված օրենքները Սորոսի հիմնադրամի տարածած հայտարարության մեջ որակվում են իբրև «ծայրահեղ անլուրջ» և ենթադրվում է, որ բարվերաքության ստուգում իրականացվելու է միայն ՀՀ Սահմանադրական դատարանի դատավորների, դատավորների, դատախազների, քննիչների թեկնածուների համար, իսկ գործող դատավորների, ինչպես նաև դատախազների, քննիչների համար բարեվարքության ստուգում չի նախատեսվում: