ԵՐԵՎԱՆ, 20 ապրիլի – Sputnik. ՀՀ առողջապահության նախարարությունը հայտնում է, որ մեկ օրվա ընթացքում կորոնավիրուսի հետևանքով գրանցվել է մահվան երկու դեպք։
«Պացիենտները եղել են 62 և 90 տարեկան։ Նրանք երկուսն էլ ունեցել են ուղեկցող խրոնիկական հիվանդություններ»,–նշված է հաղորդագրության մեջ։
Մահացածները տղամարդիկ են։
Նախարարությունը միաժամանակ հայտնում է, որ կորոնավիրուսային հիվանդությամբ այս պահին փաստացի բուժում է ստանում 737 պացիենտ: Ընդհանուր առմամբ, կատարվել է 13373 թեստավորում:
Sputnik Արմենիան երեկ հայտնել էր, որ մահվան 1 դեպք է գրանցվել Շիրակի մարզի Մարալիկ համայնքում. 90-ամյա տղամարդը, որի թեստը դրական էր եղել, հիվանդության հաստատումից 1 ժամ անց մահացել էր:
Շիրակի մարզպետ Տիգրան Պետրոսյանը Sputnik Արմենիայի հետ զրույցում հայտնել էր, որ տղամարդն ուներ նաև ծերունական խնդիրներ: Նրա խոսքով` մինչ նմուշառումը, հաշվի առնելով տարեց մարդու առողջական խնդիրները, ընտանիքի անդամները նախընտրել էին բուժումն իրականացնել տանը:
Ապրիլի 20-ի, ժամը 11:00-ի դրությամբ հաստատվել է կորոնավիրուսային հիվանդության 1339 դեպք, որոնցից 580-ն` առողջացած, 22-ը` մահվան ելքով: