ԵՐԵՎԱՆ, 20 ապրիլի — Sputnik. «Իմ քայլը» խմբակցությունն ակնկալում է, որ այն անձինք, որոնք պատասխանատու են ՀՀ վարչապետ Նիկոլ Փաշինյանի` Հանրային հեռուստաընկերության եթերից առաջ նկարահանված կադրերը հանրայնացնելու հարցում, պատասխանատվություն կկրեն։ Ազգային ժողովում խորհրդարանական ճեպազրույցների ժամանակ այս կարծիքը հայտնեց «Իմ քայլը» խմբակցության ղեկավար Լիլիթ Մակունցը։
«Այն, ինչ տեղի է ունեցել, անընդունելի է մեր խմբակցության համար։ Ակնկալում ենք, որ կարճ ժամանակում այդ ամենը հետևանքներ է ունենալու։ Մեր դիրքորոշումն այդ առումով բավականին կոշտ է և վճռական»,–ասաց Մակունցը։
Նրա խոսքով` տեղի ունեցածը տեղեկատվական անվտանգության խնդիր է, քանի որ կարող էին հնչել նախադասություն կամ արտահայտություն, որոնք ոչինչ չեն ասում ներկա գտնվողների համար, սակայն դրանք լուրջ խնդիր կարող էին լիներ անվտանգության տեսանկյունից։
Մակունցն ասաց նաև, որ եթե կարճ ժամանակահատվածում պատասխանատվության ենթարկվողներ չլինեն, ապա «Իմ քայլը» պատրաստվում է ՀՌԱՀ–ի խորհրդին հրավիրել խմբակցություն և պահանջել, որ նման դեպքերը բացառեն ու զբաղվեն պատասխանատվության հարցով։
Անդրադառնալով հնչող կարծիքներին, թե վարչապետի մամուլի խոսնակ Մանե Գևորգյանը նույնպես իր մեղավորությունն ունի, քանի որ պետք է հետևեր ընթացքին` Մակունցն ասաց, որ չի կիսում այդ տեսակետը։ Նա նշեց, թե Գևորգյանի պարտականությունների մեջ չեն մտնում հեռարձակման տեխնիկական նրբություններին տիրապետելը։
Հիշեցնենք՝ ապրիլի 17-ին վարչապետ Նիկոլ Փաշինյանը կորոնավիրուսի թեմայով ժողովրդին ուղերձ հղեց, իսկ ապրիլի 18-ին համացանցում հայտնվեցին ուղերձի նախապատրաստական փուլից մինչև ուղիղ եթեր մտնելու կադրերը։ Մոնտաժված տեսանյութում Փաշինյանին փորձել էին ներկայացնել ծաղրական կերպարում։