ԵՐԵՎԱՆ, 16 ապրիլի – Sputnik. Dior ֆրանսիական նորաձևության ապրանքանիշի կրեատիվ տնօրեն Մարիա Գրացիա Կյուրին պատկերել է մի զգեստի էսքիզ, որի վրա տարբեր լեզուներով սիրո խոստովանություններ են գրված, այդ թվում` հայերեն. «Սիրում եմ քեզ»։
Vogue ամսագրի Instagram–յան էջում հրապարակվել է էսքիզի լուսանկարը, ինչպես նաև Մարիա Գրացիայի խոսքերը. «Սերն ունիվերսալ է, ինչպես և բոլոր լեզուները, որով խոսում են Dior–ի ստուդիայում։ Հիմա ավելի քան երբևէ պետք է հիշել, որ բոլորս նույն աշխարհից ենք»։
Հեղինակավոր ամսագրի ապրիլյան համարում հրապարակված այս նկարին կհաջորդեն Dior–ի կրեատիվ տնօրենի մյուս աշխատանքները։
Նշենք, որ Vogue–Իտալիայի ապրիլյան համարն ամսագրի գոյության 100 տարվա պատմության մեջ առաջին անգամ լույս է ընծայվել սպիտակ շապիկով`առանց գրաֆիկայի և լուսանկարների։ Գլխավոր էջի լուսանկարն ապրիլի 8-ին հայտնվել էր պարբերականի Instagram–յան էջում։
Ինչպես լուսանկարին կից գրել էր ամսագրի գլխավոր խմբագիր Էմանուելե Ֆարնետին, մինչ այդ խմբագրությունը պատրաստվել էր հերթական համարը թողարկել L'Uomo Vogue–ի հետ համագործակցությամբ, բայց հետո ղեկավարությունը որոշել էր չշրջանցել կորոնավիրուսի թեման։
«Սպիտակը նախևառաջ հարգանքի նշան է։ Սպիտակը վերածնունդ է, խավարից հետո լույս, բոլոր գույների համագումար։ Սպիտակը այն մարդկանց համազգեստի գույնն է, որոնք սեփական կյանքն են վտանգում` փրկելով մերը։ Սպիտակը նրանց համար է, ովքեր ժամանակն ու տարածությունը լցնում են գաղափարներով, մտքերով, պատմություններով, բանաստեղծություններով, երաժշտությամբ և մյուսների մասին հոգ տանելով... Սպիտակ են դարձել գիշերները, երբ մենք էջատում էինք այս համարը օվկիանոսի երկու կողմերում ստեղծված բարդ իրավիճակում։ Եվ վերջապես սպիտակը պարտվածների գույնը չէ, այլ պատմության մաքուր էջ, պատմություն, որ նոր է սկսվում», – գրված է Ֆարնետիի ուղերձում։
Ապակու տարբեր կողմերում․ բժիշկ հոր ու կամավոր դստեր հանդիպման լուսանկարը հուզել է մարդկանց
Ամսագրի այս համարը թողարկելու գործում, Dior–ի տան կրեատիվ տնօրենից բացի, ներգրավվել են նաև նորաձևության աշխարհում ճանաչում ունեցող այլ անձինք ևս` Միուչա Պրադան, Valentino–ի կրեատիվ տնօրեն Պիեռպաոլո Պիչոլին, ինչպես նաև Gucci–ի կրեատիվ տնօրեն Ալեսանդրո Միկելեն։ Դիզայներներն ամսագրի միջոցով ուղերձ են հղել` այս բարդ ժամանակաշրջանում սատարելով աշխարհով մեկ սփռված երկրպագուներին։