ԵՐԵՎԱՆ, 16 ապրիլի – Sputnik․ Աշխարհահռչակ հոլիվուդյան դերասաններ Ռոբերտ դե Նիրոն և Լեոնարդո դի Կապրիոն մասնակցել են բարեգործական ակցիայի, որի նպատակն է սննդամթերք գնելու միջոցներ հավաքել այն մարդկանց համար, ովքեր COVID-19-ի համավարակի և ԱՄՆ-ում հաստատված սահմանափակումների պատճառով զրկվել են եկամտից։
«Խնդիր չկա, Նիկոլ Փաշինյան». Ալեքսիս Օհանյանը միացավ չելենջին
Դի Կապրիոն Instagram-ի իր պաշտոնական էջում տեսանյութ է հրապարակել, որում դերասաններն իրենց երկրպագուներին կոչ են անում միանալ ակցիային և նվիրատվություններ կատարել։ Ամենաշռայլին խոստանում են իրենց հաջորդ ֆիլմի պրեմիերային ներկա գտնվելու հնարավորություն տալ։
«Սրանից առաջ մենք սկսել էինք AmericasFoodFund ծրագիրը։ Ուզում ենք օգնել յուրաքանչյուր ընտանիքի, որն ունի դրա կարիքը, որպեսզի այս ծանր ժամանակներում սնունդը հասանելի լինի նրանց համար։ Այս պահին մեր ամենախոցելի հայրենակիցներն ունեն մեր օգնության կարիքը, ինչպես երբեք։ Այդ պատճառով մենք ձեզ խնդրում ենք օգնել»,-գրել է դի Կապրիոն։
Նա նշել է, որ սա լավ հնարավորություն է այն մարդկանց համար, ովքեր երբևէ հետաքրքրվել են, թե դա ինչ զգացողություն է՝ աշխատել այնպիսի մեծ վարպետների հետ, ինչպիսիք են Մարտին Սկորսեզեն, Ռոբերտ դե Նիրոն և ինքը։
«Ռոբերտի հետ միասին մենք պատրաստվում ենք նկարահանվել նոր «Լուսնածաղիկ սպանողները» ֆիլմում։ Մենք կարող ենք ձեզ էպիզոդիկ դեր առաջարկել, ինչպես նաև հնարավորություն տալ մեզ հետ միասին մեկ օր անցկացնելու նկարահանման հրապարակում և ներկա գտնվելու ֆիլմի պրեմիերային»,-ավելացրել է դի Կապրիոն։
Տեսաուղերձը մի քանի ժամում ավելի քան 1,2 միլիոն դիտում է ունեցել:
«Այս մոլորակն իրոք ավելի շատ ձեզ նման մարդկանց կարիքն ունի», «Շնորհակալություն օգնության համար», «Մենք ձեզ սիրում ենք»,- գրել են դերասանների երկրպագուները։
Մարտին Սկորսեզե «Լուսնածաղիկ սպանողները» ("Убийцы лунного цветка") ֆիլմը վարձույթի դուրս կգա հաջորդ տարի։
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ։ Կազմակերպությունը բոլոր պետություններին կոչ է արել միանալ վարակի դեմ ակտիվ պայքարին։