ԵՐԵՎԱՆ, 16 ապրիլի – Sputnik. ՀՀ մի քանի տասնյակ քաղաքացիներ շարունակում են մնալ Մոսկվայի «Դոմոդեդովո» օդանավակայանում` սպասելով հայրենիք մեկնող չվերթի։ Լրագրող Վյաչեսլավ Նեմիշևի հետ զրույցում քաղաքացիներից մեկն ասել է, որ իրենք պարբերաբար շփվում են Ռուսաստանում Հայաստանի դեսպան Վարդան Տողանյանի հետ։
«Մեզ ինքնաթիռ է պետք, որպեսզի հայրենիք վերադառնանք։ Իսկ ինքնաթիռ չեն տալիս», – ասել է նա լրագրողին։
Մեկ այլ քաղաքացի էլ ասել է, որ իրենք այլևս անելիք չունեն Մոսկվայում և մնալու հնարավորություն չկա։
«Մենք արդեն երկու օր է` օդանավակայանում ենք։ Մոսկվայում ամեն ինչ փակ է, աշխատանք չկա», – նշել է նա։
Ավելի վաղ ՌԴ-ում ՀՀ դեսպան Վարդան Տողանյանը տեսակապի միջոցով խոսել էր «Դոմոդեդովո» օդանավակայանում գտնվող այն ՀՀ քաղաքացիների հետ, որոնք նախորդ օրվա չարտերային թռիչքով չեն կարողացել մեկնել Հայաստան։ ՌԴ-ում ՀՀ դեսպանությունից հայտնել էին, որ առաջիկայում դեպի Երևան թռիչք չի նախատեսվում։
Հիշեցնենք ապրիլի 12-ին «Դոմոդեդովո» օդանավակայանից Մոսկվա-Երևան երրորդ չարտերային չվերթով հայրենիք վերադարձան 230 քաղաքացի, որոնցից 201-ի մեկնումը կազմակերպվել է անվճար։ Ավելի վաղ՝ ապրիլի 6- ին և 7-ին կազմակերպված չարտերային չվերթերով 400-ից ավելի քաղաքացի է տեղափոխվել Հայաստան։
Հայրենիք վերադառնալու համար դեսպանությունում ցուցակագրվածների թիվը, սակայն, գրեթե 2000 էր։ Հիշեցնենք, որ նշված չարտերային չվերթերով Հայաստան վերադարձած բոլոր քաղաքացիներն անմիջապես օդանավակայանից տեղափոխվել են մեկուսացման հատուկ վայրեր՝ 14-օրյա կարանտինային պարտադիր ռեժիմում անցկացնելու համար։