ԵՐԵՎԱՆ, 15 ապրիլի – Sputnik․ Կարանտինի օրերին Հայաստանի արտակարգ իրավիճակների նախարարության «911» փրկարար ծառայություն դիմում են ոչ միայն ՃՏՊ-ների կամ կենցաղային արտակարգ պատահարների դեպքում, այլև հոգեբանական աջակցության համար։ Մարտի 16-ից հանրապետությունում արտակարգ դրության ռեժիմ է հայտարարված, ու մեկ ամիս շարունակ բնակչության մեծ մասը նստած է տանը։
Այս ամսվա ընթացքում ԱԻՆ «թեժ գիծը» հոգեբանական օգնության խնդրանքով 398 զանգ է ստացել։ Նախորդ ամիս՝ մինչև կարանտինը, այս ցուցանիշը երեք անգամ փոքր է եղել։
«Զանգերի մեծ մասը սթրեսի հետևանք է։ Մարդիկ բողոքում են վատ տրամադրությունից, դեպրեսիայից, ընդհանուր առմամբ` երկրի վիճակից։ Ոմանց թվում է, թե ջերմություն ունեն»,- Sputnik Արմենիայի թղթակցին հայտնել են ԱԻՆ մամուլի ծառայությունից։
Մի քաղաքացի «թեժ գիծ» էր զանգել խուճապի մեջ, որ սեփական բնակարանում շնչելու օդ չկա։ «Խեղդվում եմ, չեմ կարողանում շնչել»։ Մեկ ուրիշը բողոքել է ուժեղ գլխացավից, որը երկրում տիրող իրավիճակի պատճառով է։ Բոլոր դեպքերում «թեժ գծի» օպերատորները նախ ուշադիր լսում են քաղաքացիներին, ապա օգնում խորհրդով։
«Մեր աշխատակիցների կյանքում շատ բան չի փոխվել, բոլորը, բացի հղիներից և 50-ից բարձր տարիքի մարդկանցից, առաջվա պես աշխատանքի են գալիս, պատասխանում են զանգերին։ «911»-ի ոչ մի զանգ չպետք է անպատասխան մնա»,-ասեց նախարարության մամուլի քարտուղար Էդմոն Զարգարյանը։
ԱԻՆ զանգահարածների հոգեբանական վիճակը պարզելուց հետո պարտադիր ճշտվում են նրանց տվյալները։ Նախարարության տեղեկություններով՝ 398 զանգահարողների մեջ ոչ մի անչափահաս չի եղել։
Ի՞նչ է կատարվում օրգանիզմում, երբ կոճապղպեղ ենք կիրառում․ հայտնի մթերքի օգուտն ու վնասը
«Նախքան կարանտինը երբեմն մեր ծառայություն զանգում էին դեռահասները և փորձում էին օպերատորների «գլխին սարքել»։ Մեր աշխատակիցներն անգամ այդ դեպքում պետք է սիրալիր լինեն։ Բայց այս ամսվա ընթացքում նման զանգեր չեն եղել»,-հայտնեցին ԱԻՆ-ից։
«911» ծառայությունն աշխատում է շուրջօրյա։ ԱԻՆ-ի աշխատակիցները հստակ հրահանգ ունեն․զանգահարողի մոտ դեպրեսիայի և ճնշվածության իրական ախտանիշների դեպքում նրան ուղղորդել հոգեբանական օգնության կենտրոն։
Կորոնավիրուս․ դավադրության տեսություններից եկեք ընտրենք լավատեսականը
Ապրիլի 15-ի դրությամբ Հայաստանում COVID-19-ով վարակվածների ընդհանուր թիվը հասնել է 1111-ի։ Մահացել է 17 մարդ։
Ապրիլի 13-ին ՀՀ կառավարությունը որոշում է ընդունել երկարաձգել արտակարգ դրությունը ևս 30 օրով`մինչև մայիսի 14-ի ժամը 17։00-ը։ Սահմանափակված են երկրից ելքն ու մուտքը, արգելված են հանրային միջոցառումները։ Փակ են նաև կրթական և մշակութային հաստատությունները։