ԵՐԵՎԱՆ, 15 ապրիլի - Sputik. Բարձրագույն դատական խորհուրդը Facebook-ի պաշտոնական էջում հաղորդագրություն է տարածել՝ տեղեկացնելով, որ Երևան քաղաքի առաջին ատյանի ընդհանուր իրավասության դատարանի Էրեբունի նստավայրի տեխնիկական անձնակազմի աշխատակիցներից մեկի մոտ թեստավորման արդյունքում կորոնավիրուսային հիվանդություն է հաստատվել:
«Հարկ ենք համարում տեղեկացնել, որ տվյալ աշխատակիցն իր ընտանիքի հետ արդեն իսկ գտնվել է մեկուսացման մեջ՝ պայմանավորված ընտանիքի անդամներից մեկի մոտ մեկ շաբաթ առաջ հաստատված կորոնավիրուսային հիվանդության պատճառով»,– նշված է հաղորդագրության մեջ։
Աշխատակիցն ինքն է անձամբ է հեռախոսազանգով տեղեկացրել, որ ընտանիքի անդամի մոտ թեստը դրական արդյունք է ցույց տվել, և ինքն աշխատանքի չի ներկայանալու, քանի որ ամբողջ ընտանիքով ինքնամեկուսացել են:
«Հարկ ենք համարում տեղեկացնել նաև, աշխատակցի զանգից հետո անմիջապես կապ է հաստատվել Առողջապահության նախարարության Հիվանդությունների վերահսկման և կանխարգելման ազգային կենտրոնի հետ և օպերատիվ կերպով կազմակերպվել են համավարակի կանխարգելմանն ուղղված բոլոր անհրաժեշտ միջոցառումները: Դրանց շրջանակներում այսօր կանխարգելիչ նկատառումներով թեստավորման կենթարկվի Էրեբունի նստավայրի 5 աշխատակից»,- նշված է հաղորդագրության մեջ:
ԲԴԽ-ն դեռ մարտին տեղեկացրել էր, որ ջերմային աերոզոլային գեներատորներով և ախտահանիչ նյութերով իրականացվել են Բարձրագույն դատական խորհրդի վարչական շենքի, Վճռաբեկ, Վերաքննիչ քրեական, Վերաքննիչ քաղաքացիական, Վերաքննիչ վարչական, Վարչական դատարանների, ինչպես նաև Երևան քաղաքի առաջին ատյանի ընդհանուր իրավասության դատարանի բոլոր նստավայրերի, այնպես էլ մարզային դատարանների նստավայրերի սպասարկման սրահները, միջանցքները, դատական նիստերի դահլիճները, դատավորների և վերջիններիս աշխատակազմերի աշխատասենյակները, կալանավորների ժամանակավոր պահման խցերը, պատերը, դռները և դատարանների հարակից տարածքները։ Կորոնավիրուսի նոր դեպքի բացահայտումից հետո կրկին իրականացվել են ախտահանիչ միջոցառումներ Էրեբունի նստավայրում, նաև իրականացվելու են դատական իշխանության մյուս բոլոր վարչական շենքերում ևս:
Հիշեցնենք, որ Հայաստանում կորոնավիրուսով վարակվածների թիվն արդեն հասել է 1111-ի։