Կարեն Սարգսյանը կորոնավիրուսի համաճարակի տնտեսական հետևանքները պայմանականորեն բաժանում է 3 ալիքների: Sputnik Արմենիայի հետ զրույցում նա նշեց, որ Հայաստանն այս պահին գտնվում է դեռ առաջին ալիքի ազդեցության գոտում:
«Պայմանական երկրորդ ալիքը լինելու է ճգնաժամից ու արտակարգ դրության վերացումից հետո: Ես կարծում եմ, որ լինելու են և այսօր էլ կան ոլորտներ, որոնք աշխարհահռչակ կազմակերպությունների կանխատեսումներով մեկ տարի հետո նոր վերականգնվելու են՝ լավագույն դեպքում: Դրանք տուրիզմն ու հյուրընկալային ոլորտներն են: Հյուրընկալային ոլորտը մի քանի բաղադրիչներ ունի`հյուրանոցները, ռեստորանները, բարերը, ինչպես նաև փոխադրող ընկերությունները և ավիաընկերությունները»,- ասաց Սարգսյանը:
Այս ալիքն, ըստ Սարգսյանի, կտևի շուրջ 3-4 ամիս:
«Պայթյուն» հետո կլինի․ ինչպես է կորոնավիրուսը ազդում Հայաստանի տնտեսության վրա
Դե, իսկ երրորդ ալիքը՝ հետկորոնավիրուսյան ժամանակահատվածը, որոշ կանխատեսումներով կսկսվի արդեն այս տարվա աշնանը կամ գուցե՝ հաջորդ տարեսկզբին: Այս ալիքի հզորությունն, ըստ Կարեն Սարգսյանի, կախված կլինի այն հանգամանքից, թե որքանով ՀՀ կառավարությանը կհաջողվի ճիշտ դիմակայել առաջին երկու ալիքներին: