ԵՐԵՎԱՆ, 11 ապրիլի — Sputnik. ԱԺ նախկին պատգամավոր, ԵԿՄ նախկին նախագահ, գեներալ Մանվել Գրիգորյանին պատկանող Ակնալճի ամառանոցի տարածքից հայտնաբերված գույքը, այդ թվում` մեքենաներն ու սնունդը, Երևանի ընդհանուր իրավասության դատարանի որոշմամբ հանձնվել են ԵԿՄ-ի տնօրինմանը։ Sputnik Արմենիայի հետ զրույցում նրա պաշտպան Արսեն Մկրտչյանը հայտնեց, որ խոսքը գնում է այնպիսի ավտոմեքենաների մասին, որոնք գրանցված են երրորդ անձանց անունով։
«ԵԿՄ–ին են փոխանցվել «ՈւԱԶ»–ները, պահածոյացված սնունդը և այլն։ Սննդի փոխանցման հարցը երբեք ոչ ոք չի էլ առարկել, քանի որ այն կարող էր փչանալ։ Իսկ ինչ վերաբերում է գույքին, ապա այն որևէ կապ չունի Մանվել Գրիգորյանի հետ, այսինքն` խախտվել է երրորդ անձանց իրավունքը, ոչ թե իմ պաշտպանյալի»,–ասաց Մկրտչյանը։
Նրա խոսքով` այդ գույքը ԵԿՄ–ին է հանձնվել տնօրինման, ոչ թե սեփականության իրավունքով, սակայն այդ գույքի տերերը կարող են հետագայում դատարան դիմել։ Պաշտպանը կարծում է, որ դատարանի վրա ԵԿՄ–ն որոշակի ազդեցություն է գործել։
Մկրտչյանը հիշեցրեց` Ակնալճում գործում էին տարբեր ՍՊԸ–ներ, առևտրա–կազմակերպական ձև ունեցող ընկերություններ։
Անդրադառնալով Գրիգորյանի առողջական վիճակին` պաշտպանը նշեց, որ նրա վիճակը շարունակում է մնալ ծանր, ավելին, նրա մոտ նոր հիվանդություններ են ի հայտ եկել` նոր դրսևորումներով։
«Գրիգորյանն այժմ գտնվում է տանը: Նրա կյանքին դեռ վտանգ է սպառնում։ Մենք քանիցս միջնորդություն ենք ներկայացրել դատարան` Գրիգորյանի բուժումը դրսում կազմակերպելու համար։ Սակայն, հավանաբար, դատարանը նման հանձնարարություն չունի, որ նա պետք է ողջ արդարացվի»,–ասաց պաշտպանը։
Հիշեցնենք` դեռ 2018–ի հոկտեմբերին Գրիգորյանը դիմել էր կառավարությանը՝ Ակնալիճ համայնքում իրեն պատկանող «Ակնալճի կուղբաբուծական տնտեսություն» ընկերության շուրջ 330 հեկտար տարածքը ՀՀ-ին նվիրաբերելու համար։
Համայնքապետներն ուզում են Մանվել Գրիգորյանից հետ ստանալ իրենց հողերը. 40 գործարք է եղել
Մանվել Գրիգորյանը մեղադրվում է ապօրինի կերպով զենք-զինամթերք պահելու, 101.232.917 ՀՀ դրամի գույք յուրացնելու, 1.228.176.342 ՀՀ դրամի հարկերի վճարումից խուսափելու, պետական միջոցներից 1.225.003.300 ՀՀ դրամ վատնելու և շորթմամբ 37․101․100 ՀՀ դրամ արժողությամբ գույքի հափշտակությունը կազմակերպելու մեջ: Նա 1.5 տարի կալանքի տակ էր։
Երևան քաղաքի ընդհանուր իրավասության դատարանը 2020թ.–ի հունվարի 15-ին որոշեց նրա խափանման միջոց կալանավորումը փոխել չհեռանալու մասին ստորագրությամբ:
Մանվել Գրիգորյանը Ֆրանսիա չի մեկնի. դատարանը որոշում կայացրեց