Արամ Օրբելյանի փոխանցմամբ` դատավորի թերթիկի ժամկետը կերկարացվի, թե ոչ, էական նշանակություն չունի։ ՀՀ երկրորդ նախագահի պաշտպանական խմբի տեսանկյունից խնդիրն այն է, որ կա խափանման միջոցի հետ կապված միջնորդություն, ինչն առավել հրատապ է այս վիճակում, քանի որ առկա է անմարդկային վերաբերմունքի հետ կապված հարց։ Այսինքն` պահման պայմանների առթիվ պետք է հաշվի առնվի կորոնավիրուսի հետ կապված զարգացումները։
Նշենք, որ Ռոբերտ Քոչարյանի և մյուսների գործով դատավոր Աննա Դանիբեկյանին տրամադրված ժամանակավոր անաշխատունակության թերթիկի ժամկետը ներառյալ սույն թվականի ապրիլի 16-ն է, և եթե բուժող բժշկի կողմից այն չերկարաձգվի, դատավորն ապրիլի 17-ին կներկայանա աշխատանքի:
«Աննա Դանիբեկյանը կվերադառնա աշխատանքի, շատ լավ, իրեն առողջություն, բայց դա չի նշանակում, որ խափանման միջոցի վերաբերյալ ներկայացված միջնորդությունները մինչ այդ պետք է չքննվեն։ Դանիբեկյանը կվերադառնա, որից հետո նիստ կնշանակի ենթադրաբար 18–ին, 19–ին կամ 20–ին։ Արդյունքում ստացվում է, որ անձը գտնվում է անազատության մեջ, նրա ազատության հետ կապված հարցը քննարկվել է շուրջ հինգ ամիս առաջ, և փաստացիորեն այս միջնորդությունը քննության առարկա չի դառնում, թեև արդեն իսկ ներկայացվել է»,– նշում է փաստաբանը։
Արամ Օրբելյանի տեղեկացմամբ` երբ տիկին Դանիբեկյանը գնում էր արձակուրդ, ասաց, որ եթե կան միջնորդություններ, կարող են դրանք ներկայացնել, ըստ այդմ` Աննա Դանիբեկյանը վիրահատվելուց առաջ պետք է գոնե մեկ անգամ Ռոբերտ Քոչարյանի կալանավորման հարցը վերանայեր։
Ռոբերտ Քոչարյանը դուրս է գրվել հիվանդանոցից
«Նման դեպքերում դատավորը կարող է ապահովել, որ հրատապ միջնորդությունները քննեն այլ դատավորներ, մանավանդ որ Բարձրագույն դատական խորհրդի համապատասխան որոշումը նախատեսում է առանձին միջնորդությունը վերամակագրելու հնարավորություն և Մարդու իրավունքների եվրոպական կոնվենցիայով և Սահմանադրությամբ սահմանված իրավունքները գործում են անմիջականորեն»,– նշում է փաստաբանը։
Պաշտպանի կարծիքով` եթե նույնիսկ իրավական սահմանումներ չլինեն, պարտավոր են ապոհվել այնպիսի կառուցակարգ, որպեսզի խափանման միջոցի փոփոխության հարցը վերանայելու խնդիրը չմնա պայմանականորեն ասած առանց դատավոր։
ՀՀ երկրորդ նախագահի պաշտպանը տեղեկացնում է, որ այսօր կներկայացվի ևս մեկ միջնորդություն կապված կորոնավիրուսից բխող իրավիճակի հետ, և ուշադրություն է հրավիրում այն կարևոր հանգամանքի վրա, որ անկախ նրանից` միջնորդություն կներկայացվի, թե ոչ, տեսանելի է այնպիսի դատական պրակտիկա, երբ բազմաթիվ դատավորներ իրենք են իրենց նախաձեռնությամբ վերանայում խնդիրը։ Դատախազությունն իր հերթին հայտարարում է , որ դատավորները պետք է ստանձնեն վերանայման գործընթացը, հետևաբար անկախ պաշտպանների ներկայացման հանգամանքից` հարցը պետք է քննվեր։
Օրբելյանի նշում է, որ առկա է խափանման միջոցի անձնական երաշխավորություն կիրառելու միջնորդություն` հաշվի առնելով կորոնավիրուսի հանգամանքը, ինչը ևս մեկ անգամ պետք է դառնա քննարկման առարկա։ Երբ դատարանը քննարկի խափանման միջոցի հարցը, մի շարք այլ հարցերի շրջանակներում պետք է դիտարկի անձի առողջական վիճակի պարամետրերը և գնահատի, թե արդյոք կան խափանման միջոց կիրառելու հիմքեր, թե ոչ։
«Արցախին հերոսական անցյալով ղեկավար է պետք». Քոչարյանն ուղերձով դիմել է արցախցիներին
Հիշեցնենք, որ ապրիլի 9–ին ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը հայցադիմումներ էր ներկայացրել Վարչական և Ընդհանուր իրավասության դատարաններ ընդդեմ Քրեակատարողական ծառայության։ Պաշտպանական կողմը պահանջում է կանխել իրավունքները խախտող գործողությունները, մասնավորապես՝ անմարդկային վերաբերմունքը և խոշտանգումները Ռոբերտ Քոչարյանի նկատմամբ: