ԵՐԵՎԱՆ, 8 ապրիլի – Sputnik. Հայաստանում կորոնավիրուսով հիվանդ քաղաքացիներից ևս մեկը մահացել է: Ինչպես Facebook-ում կատարած գրառման մեջ հայտնում է ՀՀ վարչապետ Նիկոլ Փաշինյանը, մահացածն 93 տարեկան էր, տառապում էր նաև քաղցկեղով:
Վարչապետը նաև հայտնում է, որ այս պահին հիվանդանցում է գտնվում ևս 8 ծայրահեղ ծանր վիճակում գտնվող պացիենտ:
Նշենք, կորոնավիրուսով վարակվածների թիվը Հայաստանում այսօր ժամը 11-ի տվյալներով 881 է:
«Ընդհանուր առմամբ, զգուշավոր լավատեսությունը պահպանում ենք: Եթե այս վիճակագրությունը շարունակվի, կնշանակի՝ կորոնավիրուսի պիկը հաղթահարել ենք, և պիկը եղել է մարտի 31-ին»,- հույս է հայտնում Փաշինյանը:
Նշենք, որ Հայաստանում կորոնավիրուսից մահվան 9րդ դեպքին իր ֆեյսբուքյան էջում անդրադարձել է նաև Առողջապահության նախարարության խոսնակ Ալինա Նիկողոսյանը:
Նա նշել է, որ մահվան նոր դեպքն արձանագրվել է Արտաշատի բժշկական կենտրոնում։ 93-ամյա պացիենտն ունեցել է նաև ուղեկցող խրոնիկ հիվանդություններ, այդ թվում՝ շագանակագեղձի քաղցկեղ, զարկերակային հիպերտոնիա։
Հիշեցնենք՝ Հայաստանում կորոնավիրուսից մահանալու առաջին դեպքը գրանցվել էր մարտի 26-ին։ Եվս երկուսը մահացել էին մարտի 29-ին, մեկը` ապրիլի 1-ին։ Մահվան 3 դեպք էլ գրանցվել էր ապրիլի 2-ին։ Իսկ 8-րդ դեպքի մասին հայտնի դարձավ ապրիլի 6-ին:
Երևանում վթարի է ենթարկվել կորոնավիրուսով վարակված քաղաքացիներին տեղափոխող մեքենան
Ավելի վաղ ՀՀ առողջապահության նախարար Արսեն Թորոսյանը հայտնել էր` 16 հաստատություն կա, որտեղ պահվում են թե՛ դրական, բայց թեթև վիճակում գտնվող հիվանդները, թե՛ այն քաղաքացիները, որոնք շփվել են վարակված մարդկանց հետ։ Բայց 9 կազմակերպություն էլ կա, որոնք զբաղվում են գրեթե միայն կորոնավիրուսով հիվանդների բուժմամբ` «Նորքի» ինֆեկցիոն հիվանդանոցը, Օրթոպեդիայի ինստիտուտը, Ոստիկանության հոսպիտալը, «Սուրբ Աստվածամայր» բժշկական կենտրոնի ծննդատան մասնաշենքը, Արտաշատի բժշկական կենտրոնը, Գյումրու և Վանաձորի ինֆեկցիոն հիվանդանոցները, Կապանի բժշկական կենտրոնի առանձին մասնաշենքը։ ՀՀ առողջապահության նախարար Արսեն Թորոսյանը երեկ հայտնեց, որ այսուհետ «Սուրբ Գրիգոր Լուսավորիչ» բուժկենտրոնը կծառայի միայն որպես կորոնավիրուսի դեմ պայքարող հիվանդանոց՝ ունենալով ամենամեծ մահճակալային ֆոնդը։
ԱԱՏՄ աշխատակիցների մոտ կորոնավիրուս է հայտնաբերվել. ավելի քան 30–ը մեկուսացված են