ԵՐԵՎԱՆ, 6 ապրիլի – Sputnik. ՀՀ առողջապահության նախարարի մամուլի պատասխանատու Ալինա Նիկողոսյանն օպերային երգչուհի Աննա Սարդարյանի մահվան մանրամասների վերաբերյալ հարցումներին չի պատասխանելու։
«Ուզում եմ վերջնականապես փակել երգչուհու թեման` հարգելով վերջինիս մահվան հանգամանքը, ինչպես նաև բժշկական և անձնական գաղտնիք ունենալու մարդու իրավունքը: Այս ընթացքում մի քանի անձ ներկայացել է ընտանիքի ծանոթ-բարեկամ և տարբեր սցենարներ փոխանցել` այդ թվում քրոջ վատառողջ լինելու մասին, ինչը պարզվեց, որ ևս իրականությանը չի համապատասխանում։ Առհասարակ թեմայի վերաբերյալ հարցերի չեմ պատասխանելու, մանավանդ որ ընտանիքը նույնպես կիսում է այս տեսակետը»,- Facebook-ի իր էջում գրել է նա։
Նշենք, որ երգչուհու քրոջ վատառողջ լինելու մասին ապրիլի 2-ին կայացած ասուլիսի ժամանակ հայտնել էր Ալինա Նիկողոսյանը։
Նա նշել էր, որ երգչուհու առողջական վիճակի հետ կապված կանչ էր գրանցվել շտապօգնության ծառայություն, բայց երգչուհին հրաժարվել էր հոսպիտալացումից:
Կանչով եկած բուժօգնության բրիգադին երգչուհին ասել էր, որ առավոտյան կդիմի հիվանդանոց, բայց առավոտյան արդեն մահը վրա էր հասել:
Հիշեցնենք՝ ապրիլի 1-ին մահացել էր Ալեքսանդր Սպենդիարյանի անվան օպերայի և բալետի ազգային ակադեմիական թատրոնի երգչախմբի անդամ Աննա Սարդարյանը: Նա 50 տարեկան էր։
Երգչախմբի անդամները վերջին նրան հանդիպել էին մարտի 13-ին:
Աննա Սարդարյանը ծնվել է 1969թ.–ին Երևանում։ Մինչև օպերայի և բալետի թատրոնում աշխատելը Սարդարյանը երգել է Հայաստանի հանրային ռադիոյի կամերային երգչախմբում։