ԵՐԵՎԱՆ, 6 ապրիլի – Sputnik. Չինացի գիտնականները պատասխանել են շատերին հետաքրքրող հարցին` արդյո՞ք մոծակները կարող են դառնալ կորոնավիրուսային վարակի տարածողներ։
Ուսումնասիրությունները ցույց են տվել, որ այդ միջատները չեն կարող տարածել COVID-19–ի։ ura.news–ի հաղորդմամբ` ԴՆԹ–ի մասնագետ Կոնստանտին Կիտաևը կարծում է, որ մոծակներն ու ճանճերը չեն կարող այս հիվանդության փոխանցողներ լինել։
Նրա խոսքով` Չինաստանում արդեն ուսումնասիրություն է անցկացվել, որի արդյունքում պարզվել է, որ ո՛չ արնախում միջատները, ո՛չ էլ առավել ևս ճանճերը, չեն կարող կորոնավիրուսի տարածողներ լինել, հետևաբար մտահոգվելու կարիք չկա։
Գիտնականները պնդում են, որ մոծակներն իրականում կարող են վարակ տարածել, օրինակ, մալարիա, դենգե տենդ կամ դեղին տենդ, սակայն COVID-19–ով վարակելու մասին տվյալներ չկան։
ԱՀԿ-ն ուսումնասիրում է առանց ախտանշանների մարդկանցից կորոնավիրուսով վարակվելու դեպքերը
Նույնը վերաբերում է նաև մյուս միջատներին, այդ թվում` ճանճերին։
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ։ Կազմակերպությունը պետություններին կոչ է արել միավորվել վարակի դեմ ակտիվ պայքարի համար։