ԵՐԵՎԱՆ, 3 ապրիլի – Sputnik․ Ռուսաստանում գտնվող ՀՀ քաղաքացիների համար ապրիլի 6-ին չարտերային թռիչք կգործի: Լուրը հայտնում է Ռուսաստանում ՀՀ դեսպանությունը։
Ռուսաստանի կառավարության կողմից «Ռեդ Վինգս» ավիանկերությունը ձեռք է բերել չարտերային թռիչք կազմակերպելու մեկանգամյա թույլտվություն։
Ապրիլի 6-ին, Մոսկվայի ժամանակով ժամը 15:40-ին, կազմակերպվելու է Մոսկվա-Երևան չարտերային թռիչքը (WZ4323), որով կարող են Հայաստան վերադառնալ բացառապես ՌԴ-ում գտնվող ՀՀ քաղաքացիները:
Դեսպանությունը հիշեցնում է, որ թռիչքով Հայաստան վերադարձած ՀՀ քաղաքացիները ենթարկվելու են 14-օրյա պարտադիր կարանտինային ռեժիմի:
Հաղորդագրության մեջ նշվում է, որ թռիչքի համար համապատասխան տոմսերը հնարավոր կլինի ձեռք բերել Մոսկվայի «Դոմոդեդովո» միջազգային օդանավակայանի N94 տոմսարկղից, ինչպես նաև Երևանի Զվարթնոց միջազգային օդանավակայանում՝ «Red wings» ավիաընկերության ներկայացուցչությունից:
«Դոմոդեդովոյում» մնացած ՀՀ քաղաքացիների մի մասի գիշերակացի խնդիրը լուծվել է
Ավիատոմսերի հետ կապված հարցերով հնարավոր կլինի կապ հաստատել հետևյալ հեռախոսահամարներով՝ +7-925-009-92-08, +7-926-618-29-18 (Մոսկվա), +374-91-969612 (Երևան)։
Հիշեցնենք՝ կորոնավիրուսի համավարակի հետևանքով դադարեցվել է Հայաստանի և Ռուսաստանի միջև ավիահաղորդակցությունը։
Հայաստանում մարտի 16-ից ապրիլի 14-ը կորոնավիրուսի տարածման դեմ պայքարի նպատակով արտակարգ դրություն է հայտարարված։
Սահմանափակված է երկրի ելքն ու մուտքը, արգելված են հանրային միջոցառումները։ Փակ են նաև կրթական և մշակութային հաստատությունները։ Ամբողջ երկրում քաղաքացիների տեղաշարժը սահմանափակված է։ Տնից դուրս գալ կարելի է միայն ծայրահեղ անհրաժեշտության դեպքում, ունենալով անձնագիր և լրացված ձևաթուղթ։