«Օրբելի» վերլուծական կենտրոնի էներգետիկ հարցերով փորձագետ Արա Մարջանյանը ողջունում է ՀՀ փոխվարչապետի՝ գազի գնի վերանայման մասին բանակցություններ սկսելու նախաձեռնությունը։
«Ստեղծված իրավիճակում շատ բնական է, որ Հայաստանը խնդրանքով դիմում է իր ռազմավարական գործընկերոջը, որպեսզի թեթևացվի ֆինանսատնտեսական բեռն էներգետիկ ոլորտում, մասնավորապես, գազի գնի հետ կապված։ Այս ուղղությամբ հնարավոր են խելամիտ լուծումներ, և շատ կարևոր է, որ այդ լուծումներն ունենան ոչ միայն կարճաժամկետ, այլև երկարաժամկետ հեռանկար»,– Sputnik Արմենիայի հետ զրույցում ասաց փորձագետը։
Մարջանյանի դիտարկմամբ` գազի գնի նվազման համար կան իրական հիմքեր։ Օրինակ` շոշափելիորեն նվազում են նավթի համաշխարհային գները, և հայտնի է, որ գազի գները ոչ անմիջականորեն, այլ միջնորդավորված կերպով կապված են նավթի գների հետ, ուստի այստեղ կարող է լինել որոշակի հիմնավորում, թե ինչ կարելի է ակնկալել գազի գների իջեցումից։
Մհեր Գրիգորյանը չի բացառում, որ գազի գնի նվազման մասին քննարկում կլինի
«Չմոռանանք նաև հիմնական գործոններից մեկը. աշխարհաքաղաքական, ռազմավարական համագործակցությունը պետք է ունենա արտահայտության և չափողականության տարբեր ձևեր, ուստի գազի գինն այդ ձևերից մեկն է»,– նշեց նա։
Անդրադառնալով գազի դիմաց ազգային արժույթով վճարելու հարցին` փորձագետը շեշտեց, որ խնդիրը նոր չէ և պայմանավորված է ԵԱՏՄ շրջանակում էներգետիկ ոլորտում ռուսական ռուբլով և ազգային արժույթով առևտրի անցնելու հանգամանքով։
Փորձագետի համոզմամբ` այս տարբերակը ձեռնտու է և՛ ռուսական, և՛ հայկական կողմին, որովհետև արագ փոփոխվող իրավիճակում, երբ տարադրամի կուրսերը ենթակա են շատ տարբեր ու անակնկալ ազդեցությունների, անցումը ռուբլով կամ ազգային արժույթով առևտրի մի փոքր բարդ կլինի, բայց կասկածից վեր է, որ գազի, էներգետիկ ոլորտում երկարաժամկետ հեռանկարի առումով դոլարից անցումը ռուբլու կամ ազգային արժույթի նպատակահարմար է և օգտակար բոլոր երկրների համար։
Հիշեցնենք՝ ՀՀ փոխվարչապետ Մհեր Գրիգորյանն այսօր հայտնեց, որ կառավարության անունից համապատասխան նամակով դիմել է «Գազպրոմ» ՀԲԸ վարչության նախագահ Ալեքսեյ Միլլերին` առաջարկելով սկսել բանակցությունների նոր փուլ Հայաստան մատակարարվող գազի գնի փոփոխության վերաբերյալ։