ԵՐԵՎԱՆ, 30 մարտի – Sputnik. ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը Sputnik Արմենիայի հետ զրույցում ասաց, որ բողոք է ներկայացրել Վերաքննիչ դատարան։
«Պահանջել ենք ոչ իրավաչափ ճանաչել Ռոբերտ Քոչարյանին անձնական երաշխավորությամբ ազատ արձակելու մասին միջնորդությունը դատարանի կողմից չքննելը և դրա քննությունն անորոշ ժամկետով հետաձգելը»,–ասաց պաշտպանը։
Ալումյանի խոսքով` Քոչարյանի գործը չքննելով` դատարանները խախտում են պաշտպանյալի իրավունքը, մասնավորապես, Եվրոպական կոնվենցիայի 5-րդ հոդվածի 4-րդ կետով։ Չորրորդ հոդվածում սահմանված է, որ յուրաքանչյուր ոք, որը ձերբակալման կամ կալանավորման պատճառով զրկված է ազատությունից, իրավունք ունի վիճարկելու իր կալանավորման օրինականությունը, որի կապակցությամբ դատարանն անհապաղ որոշում է կայացնում և կարգադրում է նրան ազատ արձակել, եթե կալանավորումն անօրինական է:
Քոչարյանին կալանքից ազատելու հարցը դեռևս կմնա առկախված
Պաշտպանն ասաց, որ բողոքը կքննի դատավոր Արմեն Բեկթաշյանը, իսկ քննության օրը դեռևս նշանակված չէ։
Հիշեցնենք, որ Քոչարյանի փաստաբանները հայտարարել էին` նիստում պատրաստվում են ներկայացնել երկրորդ նախագահին անձնական երաշխավորությամբ ազատ արձակելու միջնորդությունը։ Իսկ երաշխավորությամբ փոխելու առաջարկով հանդես էին եկել ՀՀ նախկին վարչապետներ Վազգեն Մանուկյանը, Խոսրով Հարությունյանը և Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը։
Դատական նիստերը, սակայն, հետաձգվում են գործը քննող դատավոր Աննա Դանիբեկյանի առողջական վիճակը հաշվի առնելով. դատավորը վիրահատվել է։
Քոչարյանի պաշտպանները կարծում են, որ դատական նիստը մտածված է տապալվել