ԵՐԵՎԱՆ, 28 մարտի- Sputnik. Ռուսաստանի Դաշնության ընդունած նոր սահմանափակումները չեն ազդելու երկու երկրների միջև իրականացվող բեռնափոխադրումների վրա։ Նման հայտարարություն արեց ՀՀ վարչապետ Նիկոլ Փաշինյանը Facebook -ի ուղիղ եթերում։
Նա նշեց, որ հեռախոսազրույց է ունեցել ՌԴ վարչապետ Միխայիլ Միշուստինի հետ, վերջինս հաստատել է դա։
«Ինչպես բեռները Հայաստանից տեղափոխվում էին Ռուսաստան և Ռուսաստանից՝ Հայաստան, նույն ռեժիմը շարունակվելու է»,- ասաց վարչապետը։
Անդրադառնալով վերջին օրերին Վերին Լարսում առաջացած խնդիրներին և բեռնատարների կուտակումներին, նա նշեց, որ աշխատում են Ռուսաստանի և Վրաստանի գործընկերների հետ, որպեսզի բեռնափոխադրումները շարունակվեն բնականոն իրականացվել։
35 նոր դեպք ունենք. Հայաստանում կորոնավիրուսով վարակվածների թիվն արդեն 407 է
Տարվող աշխատանքները վարչապետը բավականին արդյունավետ է գնահատում։ Համոզված է, որ առաջիկա օրերին խնդիրը կհարթվի։
«Հայաստանում սննդի ներկրումն իրականացվում է բնականոն»,- ասաց վարչապետը՝ ընդգծելով, որ մեր ունեցած միակ խնդիրը կորոնավիրուսն է, որը պետք է միասին հաղթահարենք։
Նա նշեց, որ այս իրավիճակը որոշակի տնտեսական վնասներ է բերում, բայց դրանք կվերականգնվեն։ Ճգնաժամի կառավարման համար էլ կառավարությունն արդեն հինգ ծրագիր է կազմել։ Դրանք հաստատվել են, ապրիլի 1–ի առավոտյան կսկսեն գործնականում կիրառվել։ Իսկ կառավարության առաջիկա նիստում միջոցառումների նոր խումբ կընդունվի։
Հիշեցնենք` Հայաստանում, ինչպես մի շարք այլ երկրներում, կորոնավիրուսի տարածման դեմ պայքարի համար արտակարգ դրության ռեժիմ է հայտարարվել։ Արտակարգ դրության ռեժիմը կտևի մեկ ամիս` մարտի 16–ից ապրիլի 14-ը։
Սահմանափակվել է երկիր մուտքն ու ելքը, Երևանում և մյուս քաղաքներում ագելվել են հանրային միջոցառումները, սեփականատերերի նախաձեռնությամբ փակվել են մի շարք ռեստորաններ, սրճարաններ և խանութներ (բացի պարենայինից)։ Փակ են նաև ուսումնական և մշակութային հաստատությունները։
Արտակարգ դրության ռեժիմը խստացվել է մարտի 25-ից. տնից կարելի է դուրս գալ միայն անձը հաստատող փաստաթղթով, լրացրած ձևաթղթով, խիստ անհրաժեշտության դեպքում։
Մարտի 26-ին Հայաստանում գրանցվեց կորոնավիրուսից մահվան առաջին դեպքը։
Այս պահի դրությամբ Հայաստանում կորոնավիրուսով վարակվածների թիվը 407 է։