ԵՐԵՎԱՆ, 26 մարտի — Sputnik. Արտակարգ դրության օրերին խանութները սկսել են ՀԴՄ կտրոններ չտրամադրել: Կառավարության նիստում այսօր նման հայտարարություն արեց ՀՀ վարչապետ Նիկոլ Փաշինյանը:
Կորոնավիրուսից «հիվանդացել» է նաև տնտեսությունը. ո՞ր ոլորտներն են տուժել ամենաշատը
«Նորից լայնորեն սկսել է կիրառվել ՀԴՄ չտրամադրելու պրակտիկան՝ համարելով, որ հիմա ճգնաժամային իրավիճակ է և մեծ ուշադրություն չի դարձվի»,- ասաց Փաշինյանը՝ ՊԵԿ նախագահին հանձնարարելով շատ ավելի խստացնել միջոցառումները, հայտնաբերել ու խստագույնս պատժել ՀԴՄ կտրոն չտրամադրելու յուրաքանչյուր դեպքը:
Փաշինյանն անդրադարձավ նաև այն լուրերին, թե չաշխատող ընկերություններից ու քաղաքացիներից պետությունը հարկ է պահանջում վճարել:
«Չաշխատելու, եկամուտ չունենալու, շրջանառության բացակայության պայմաններում հարկ ուզել հնարավոր չէ: Հարկ ուզում են միայն այն պարագայում, երբ կա հարկային ձևավորված պարտավորություն»,- ասաց նա:
Աշխատատեղերի կրճատում, ավելի քիչ հարկային մուտքեր. ի՞նչ է սպասվում Հայաստանի տնտեսությանը
Վարչապետը հատկապես ճգնաժամի ընթացքում կարևորեց հարկային պարտաճանաչությունը, քանի որ պետությունն իր քաղաքացներին աջակցելու համար պետք է բյուջեում գումար ունենա:
Այդուհանդերձ, վարչապետը հայտնեց նաև մեկ լավ լուր բյուջեի հետ կապված: Նրա խոսքով՝ առկա ցուցանիշների վերլուծությունը ցույց է տվել, որ այս տարվա 1-ին եռամսյակի հարկային եկամուտները, չնայած ճգնաժամին, կգերակատարվեն 5 մլրդ դրամով:
ՀՀ փոխվարչապետ, գլխավոր պարետ Տիգրան Ավինյանի որոշմամբ` ՀՀ ամբողջ տարածքում արտակարգ դրությունից ելնելով մինչև մարտի 31-ը, ժամը 23:59-ն արգելվում է զբաղվել տնտեսական գործունեության որոշ տեսակներով։
Սակայն սահմանափակումներին զուգահեռ կան նաև բացառություններ։ Մասնավորապես չի արգելվում տնտեսական գործունեության առանձին տեսակներով զբաղվել, եթե դրանք իրականացվում են բացառապես հեռավար/առցանց եղանակով։ Բացի այդ, չի արգելվի պարենային ապրանքների վաճառքի իրականացման առևտրի օբյեկտների` սուպերմարկետների, կրպակների, դեղատների, գյուղատնտեսական արտադրանքի շուկաների գործունեությունը։
Կթույլատրվեն նաև տնտեսական գործունեության որոշ տեսակներ` գյուղատնտեսություն, հանքագործական արդյունաբերություն, սննդամթերքի և խմիչքների արտադրություն, հյուրանոցների ծառայություններ, զենքի և զինամթերքի արտադրություն և այլն։
Հանքահումքի միջազգային գների անկումը կարող է ուղղակիորեն հարվածել ՀՀ տնտեսությանը