ԵՐԵՎԱՆ, 24 մարտի – Sputnik. ԱԺ-ի աշխատակիցները վաղվանից աշխատանքի կներկայանան հերթափոխով և միայն անհրաժեշտության դեպքում: Facebook- ում նման հայտարարությամբ է հանդես եկել ԱԺ նախագահ Արարատ Միրզոյանը:
«Վաղվանից ԱԺ-ում կապահովվի աշխատակիցների նվազագագույն ֆիզիկական ներկայություն՝ ԱԺ օրինաստեղծ գործունեության ապահովման պարտադիր պայմանով։ ԱԺ աշխատակիցներն աշխատանքի կներկայանան հերթափոխով, որն իր հերթին կախված կլինի արտակարգ դրության պայմաններում աշխատակազմի կոնկրետ ստորաբաժանման գործառույթների պահանջվածությունից»,- հայտնում է Միրզոյանը:
Նա նաև նշում է, որ արդեն մի քանի օր է, ինչ ԱԺ-ն աշխատանքները կազմակերպում է մասնակիորեն հեռավար-առցանց ռեժիմով՝ աշխատակիցների մի մասն աշխատում են տանից։
Հայաստանում կորոնավիրուսով վարակվածների թիվը դարձավ 249. կան ծանր վիճակում գտնվողներ
Նա միաժամանակ նշել է, որ զուգահեռաբար կազմվել են ավելի խիստ սահմանափակումների ռեժիմով աշխատանքի կազմակերպման տարբերակներ՝ անհրաժեշտության դեպքում դրանք արագ գործարկելու նպատակով։
Հիշեցնենք՝ կորոնավիրուսի տարածումը կանխարգելելու նպատակով հանրապետությունում մարտի 16-ից ապրիլի 14-ը արտակարգ դրություն է հայտարարվել:
Հայաստանում արդեն կորոնավիրուսով վարակվելու 249 դեպք է հաստատվել: Այսօր ՀՀ վարչապետ Նիկոլ Փաշինյանը հայտարարեց, որ նոր խստացումներ են մտցվում:
Մարտի 25-ից սկսած՝ տնից դուրս եկող ցանկացած քաղաքացի իր մոտ պետք է ունենա անձը հաստատող փաստաթուղթ և տեղաշարժի ձևաթուղթ, որի օրինակը կսահմանի պարետատունը: