ԵՐԵՎԱՆ, 23 մարտի – Sputnik. Ռուսաստանի Դաշնության այն քաղաքացիները, որոնք կորոնավիրուսի տարածումը կանխող սահմանափակումների պատճառով հայրենիք վերադառնալու հնարավորություն չունեն, պետք է մինչև մարտի 24-ի ժամը 9:00-ն իրենց տվյալներն ուղարկեն դեսպանության հյուպատոսական բաժնի consarmenia@mid.ru էլեկտրոնային հասցեին։
Դեսպանատան տարածած հաղորդագրության մեջ նշվում է, որ տվյալները պետք է ուղարկել հետևյալ սխեմայով.
1. Անուն, ազգանուն, հայրանուն,
2. Ծննդյան ամիս, ամսաթիվ, տարի,
3. Արտասահմանյան անձնագրի համար և սերիա,
4. Կոնտակտային հեռախոս և էլեկտրոնային փոստի հասցե,
5. Գտնվելու վայրը ներկա պահին (բնակավայր),
6. Ժամանման և պլանավորված մեկնման ժամկետներ, ինչպես նաև չվերթերի համարներ՝ նշելով փոխադրողին,
7. Հայաստանում գտնվելու նպատակը (զբոսաշրջություն, մասնավոր գործեր և այլն),
8. Հետադարձ տոմսերի առկայություն,
9. Մեկնելու վերջնակետը ՌԴ–ում։
Ստացված տվյալները կփոխանցվեն Ռուսաստանի Դաշնության տրանսպորտի նախարարությանը` վերլուծելու և օպերատիվ միջոցներ ձեռնարկելու համար:
«Խնդրում ենք ամենայն պատասխանատվությամբ վերաբերվել՝ հաշվի առնելով մոտ ապագայում դրանց իրականացման հետ կապված հնարավոր օբյեկտիվ դժվարությունները։ Ուշադրություն ենք հրավիրում այն հանգամանքի վրա, որ Ռուսաստանի Դաշնություն վերադառնալուց հետո բոլոր քաղաքացիները պետք է պատրաստ լինեն Ռոսպրոտրեբնադզորի սահմանած սանիտարահամաճարակաբանական պահանջներին, ըստ որոնց` Ռուսաստանի տարածք մուտք գործելուց հետո պետք է 14 օր լինել կարանտինում»,– նշված է հաղորդագրության մեջ։
Դեսպանատունը ՌԴ քաղաքացիներին խորհուրդ է տալիս հետևել ավիաընկերությունների թռիչքների չվացուցակներին, իրականացվող չվերթերի ազատ տեղերի առկայությանը և ձեռք բերել վաճառքում առկա տոմսերը:
Դեսպանատունը հիշեցնում է, որ ՌԴ քաղաքացիներն իրենց ավտոմեքենաները կարող են ժամանակավորապես թողնել Ռուս-հայկական մարդասիրական արձագանքման կենտրոնի տարածքում։
Մանրամասն տեղեկությունների համար կարելի է զանգել +374 99 123 465; +374 99 123 526 հեռախոսահամարներով երկուշաբթիից–հինգշաբթի ժամը 10-ից 18-ը, շաբաթ և կիրակի օրերին` 12-ից 17-ը։ Էլեկտրոնային փոստի հասցեն՝ info@rachr.ru։
Ծառուկյանը կորոնավիրուսի դեմ պայքարի համար 60 մլն դրամ է փոխանցել
Հիշեցնենք` Հայաստանում այս պահին կորոնավիրուսով վարակված 194 մարդ կա։
Կորոնավիրուսի առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Մարտի 11-ին ՀՀ–ում կորոնավիրուսի երեք նոր դեպք հայտնաբերվեց։
Վարակվածները եկել էին Իտալիայից։ Նրանցից մեկն Էջմիածնի բնակչուհի է և, ըստ լուրերի, գնացել էր Իտալիա` որդու ընտրյալի համար հարսանյաց զգեստ գնելու, այնուհետև Էջմիածնում մասնակցել էր որդու նշանադրությանը։ Դրանից հետո վարակվածների թիվը սկսեց աճել։
Մարտի 16-ին ՀՀ վարչապետ Նիկոլ Փաշինյանը հայտնեց, որ կորոնավիրուսի դեպք է արձանագրվել նաև Երևանի արտադրական ձեռնարկություններից մեկում։
Ավելի ուշ հայտնի դարձավ, որ հաստատված դեպքերի մեծամասնությունը կապված էր հենց այդ արտադրամասի հետ:
Հայաստանում մարտի 16–ից ապրիլի 14-ը արտակարգ դրություն է հայտարարվել։
Աշխարհում կորոնավիրուսով վարակվածների թիվը հասել է 339 341-ի