ԵՐԵՎԱՆ, 20 մարտի –Sputnik, Խաչիկ Չախոյան. Այսուհետ օլիմպիական խաղերի չեմպիոններն ու մրցանակակիրները ցմահ պատվովճարներ են ստանալու։ Ինչպես տեղեկացրել է Օլիմպիական կոմիտեն, սկսած 2020 թվականից չեմպիոններն ու մրցանակակիրները Հայաստանի կառավարությունից առաջին, երկրորդ և երրորդ տեղերի համար համապատասխանաբար ամսական կստանան 200, 140 և 100 հազարական դրամ պատվովճար։
Նշենք` 2015 թվականից ՀՀ կառավարության որոշման համաձայն` Հայաստանում ամսական պարգևավճար էին ստանում միայն օլիմպիական խաղերի չեմպիոնները։ Պարգևավճարը 100 հազար դրամ էր։ Ընդ որում, այդ գումարը տրվում էր չեմպիոնին, եթե նա մարզական կարիերան ավարտելուց հետո շարունակում էր աշխատել սպորտի և ֆիզկուլտուրայի ոլորտում։
Պեկինի օլիմպիական խաղերի բրոնզե մեդալակիր հունահռոմեական ոճի ըմբիշ Ռոման Ամոյանն ասում է, որ սա շատ դրական քայլ էր, որովհետև մարզիկներն արդեն հասկացան, որ պետությունն էլ է գնահատում իրենց նվաճումները. «Ամբողջ աշխարհում միշտ էլ գնահատվել են մարզիկների նվաճումներն օլիմպիական խաղերում։ Ընդ որում, շատ երկրներում պարգևավճար ամսական կտրվածքով ստացել են ոչ միայն մրցանակակիրները, այլ նաև յոթնյակում կամ ութնյակում տեղ գտած մարզիկները։ Շատ կարևոր ու հաճելի որոշում էր ՀՀ կառավարության կողմից։ Կարևորը գումարի չափը չէ։ Կարևորը վերաբերմունքն է։ Հիմա արդեն հայ մարզիկը գիտի, որ թիկունքում կա պետություն, որի մարզական պատիվը պետք է միշտ բարձր պահել»,– ասեց Ամոնյանը Sputnik Արմենիայի հետ զրույցում։
Օլիմպիադա 2008–ի արծաթե մեդալակիր Տիգրան Մարտիրոսյանի համար ՀՀ կառավարության որոշումն անսպասելի ու հաճելի է եղել. «Զարմանալի է, որ նման որոշում է կայացնում ոչ թե Հայաստանի սպորտային ղեկավարությունը, այլ ՀՀ կառավարությունը։ Բայց միևնույնն է, այս որոշումը մեծ ու դժվարին սպորտային ճանապարհ անցած մարդկանց համար շատ կարևոր է։ Պատվովճարով մեծ հարցեր չես լուծի, բայց ամեն անգամ այն ստանալիս` հիշելու ենք օլիմպիական խաղերն ու պատվո պատվանդանը։ Գնահատականը, որը տրվում է և տրվելու է օլիմպիական պատվո պատվանդանին կանգնած մարզիկին, հոգեբանական հզոր աջակցությունն է»– Sputnik Արմենիայի հետ զրույցում նշեց հայ ծանրորդը։
Հավելենք, որ կառավարության որոշման համաձայն` շախմատի օլիմպիադաների հաղթողները ևս ստանալու է պատվավճարներ։
Բացի այդ օլիմպիական մարզաձևերից աշխարհի չեմպիոն դառնալու դեպքում պատվովճարի չափը կազմելու է 100 հազար դրամ, նախկին 55 հազարի փոխարեն։ Հետաքրքիր է, որ նույն ծրագրով պատվովճարները նախատեսված են նաև նավամոդելային սպորտի և սամբոյի աշխարհի չեմպիոն մարզիկների համար։
«Ես սիրում եմ ճիշտն ասել...». ինչու է օլիմպիական արծաթե մեդալակիրն աշխատում դպրոցում
Պատվովճարը ստանալու համար կա մեկ պարտադիր պայման, օլիմպիական չեմպիոնը, մրցանակակիրը կամ օլիմպիական մարզաձևից աշխարհի չեմպիոնը պետք է բնակվի Հայաստանում և համարվի ՀՀ քաղաքացի։ Սա արդեն այն մարզիկների համար, ովքեր ավարտել են իրենց մարզական կարիերան։