ԵՐԵՎԱՆ, 16 մարտի — Sputnik. ՀՀ Սահմանադրական դատարանի նախագահ Հրայր Թովմասյանն իր այս ամսվա աշխատավարձն ու պարգևավճարները կտրամադրի բուժաշխատողներին։ Տեղեկությունը հրապարակվել է ՍԴ Facebook–ի էջում։
«Ի երախտագիտություն այս օրերին մեր բուժաշխատողների անձնուրաց աշխատանքի՝ որոշել եմ այս ամսվա իմ հիմնական աշխատավարձը, ինչպես նաև այս և մյուս ամիսների իմ պարգևավճարների ողջ հասույթը փոխանցել մեր բուժաշխատողներին»,–գրված է հայտարարության մեջ։
ՍԴ նախագահի խոսքով` սա երախտագիտության փոքրիկ քայլ է, որը թեև խորհրդանշական բնույթ է կրում, բայց շատ կարևոր խորհուրդ ունի: «Սեփական կյանքը վտանգելու գնով մեր ազգաբնակչության առողջապահության մասին գիշեր-ցերեկ հոգ տանող մասնագետները պետք է գնահատված զգան իրենց: Իմ խորին համոզմամբ՝ սա է հաջող աշխատանքի գրավականը»,–գրել է նա։
ՍԴ նախագահը հորդորել է միասնական լինել, որովհետև միմյանց քաջալերելու, նեցուկ լինելու և վճռականության շնորհիվ այս փորձությունը ևս մոտ ապագայում դառնալու է անցյալ։
Եկեղեցական արարողությունները կիրականացվեն առանց ժողովրդի
Նշենք, որ ՀՀ կառավարությունն այս պահին արտակարգ նիստով քննարկում է երկրի տարածքում արտակարգ դրություն մտցնելու հարցը։
Հիշեցնենք, որ Հայաստանում արդեն կորոնավիրուսով վարակվելու 30 դեպք է հաստատվել։ Առաջին վարակակիրը, որի մասին հայտնի դարձավ մարտի 1-ին, 29-ամյա մի տղամարդ էր, որն Իրանից էր եկել Հայաստան։ Նա արդեն իսկ կազդուրվել է։
Ինչ սահմանափակումներ կլինեն Հայաստանում արտակարգ դրության ժամանակ
Նշենք, որ կորոնավիրուսի տարածման օջախ դարձած Էջմիածնի 27 ելքերից գործելու են միայն 3-ը։ Առնվազն մինչև մարտի 23-ը ՀՀ-ում չեն գործելու կրթական հաստատությունները։ ՀՀ ԿԳՄՍ նախարար Արայիկ Հարությունյանի հանձնարարությամբ` հատուկ առցանց հարթակներ են ստեղծվում հեռավար ուսուցում կազմակերպելու համար։ Չեն գործելու նաև թատրոնները, համերգասրահները, առևտրի խոշոր կենտրոնները, մի շարք մարզասրահներ։