ԵՐԵՎԱՆ, 12 մարտի – Sputnik. Կորոնավիրուսով վարակված երեք անձանցից միայն մեկն է Էջմիածնի բնակիչ։ Տեղեկությունը հայտնում է Էջմիածնի քաղաքապետ Դիանա Գասպարյանը։
«Սիրելի՛ էջմիածնեցիներ, համացանցում տարածվել է տեղեկատվություն, թե իբր երեկ արձանագրված՝ կորոնավիրուսով վարակվածներից 3-ն էլ Էջմիածնից են, մինչդեռ նրանցից միայն մեկն է Էջմիածնի բնակիչ: Խնդրում եմ ապատեղեկատվություն չտարածել»,– Facebook–ի իր էջում գրել է նա:
Գասպարյանը նշել է նաև, որ պացիենտը մեկուսացված է, պարզվում է նրա հետ շփված անձանց հնարավոր շրջանակը:
«Մշտապես կապի մեջ եմ ՀՀ առողջապահության նախարար Արսեն Թորոսյանի հետ և հարկ եղած դեպքում կտրամադրեմ լրացուցիչ տեղեկատվություն: Խնդրում եմ չմատնվել խուճապի, պարզապես պահպանել անվտանգության ու հիգիենայի կանոնները»,– հորդորել է նա:
Նրա գրառմանն արձագանքել են օգտատերերը։
«Մեր փողոցից է այդ վարակակիր կինը։ Եկան, ընտանիքի բոլոր անդամներին տարան։ Դրա հետ մեկտեղ իրենց տղայի նշանադրությունը եղել է ամսի 8-ին։ Պատկերացնո՞ւմ եք` մինչև տանելը քանի մարդու հետ են շփում ունեցել։ Վախից դողում ենք ամբողջ փողոցով»,– գրել է մեկը։
Մեկ ուրիշն էլ նշել է, որ վախենում են երեխաներին դպրոց ուղարկել։
Հիշեցնենք` երեկ ՀՀ վարչապետ Նիկոլ Փաշինյանը հայտարարեց, որ Հայաստանում կորոնավիրուսի երեք նոր դեպք է բացահայտվել։ Երկուսը ՀՀ քաղաքացի են, (45 և 27 տարեկան) մեկը՝ Իտալիայի (51 տարեկան), որն աշխատում Է Հայաստանում։ Երեքն էլ ժամանել են Իտալիայից:
Ավելի ուշ առողջապահության նախարար Արսեն Թորոսյանը Facebook–յան ուղիղ եթերում վստահեցրեց, որ Հայաստանում կորոնավիրուսի լոկալ տարածում չկա, նոր հայտնաբերված 3 պացիենտների դեպքում վարակը ձեռքբերովի է, իրավիճակը մնում է կառավարելի։