ԵՐԵՎԱՆ, 3 մարտի — Sputnik. ՀՀ վարչապետ Նիկոլ Փաշինյանը վստահեցնում է` Հայաստանի կառավարությունն իրենից կախված ամեն ինչ կանի բիզնես միջավայրի բարելավման ու նոր ներդրումային ծրագրերի իրականացման հնարավորությունների ընդլայնման համար։ Փաշինյանն այս մասին նշել է Գործարարի օրվա կապակցությամբ իր ուղերձում։
«Բոլորիդ շնորհավորում եմ Գործարարի օրվա կապակցությամբ։ Խորհրդանշական է, որ օրը ընտրվել է՝ հաշվի առնելով հայտնի ձեռնարկատեր ու բարերար Ալեքսանդր Մանթաշովի ծննդյան օրը։ Մեր երկրում գործարարի կերպարի բնորոշիչներն են՝ արդար, օրինական, քրտնաջան աշխատանքով ձևավորված վաստակը՝ հենված կոնկրետ մեկ նպատակադրման վրա՝ հարստանալ և հարստացնել հայրենիքը, ժողովրդին, պետությունը»,– նշված է ուղերձում։
Նրա խոսքով` տոնն առիթ է ոչ միայն արժանին մատուցելու Ալեքսանդր Մանթաշովին, այլև Հայաստանի այն ձեռնարկատերերին, որոնք շարունակում են Մանթաշովի գործը։
Ինչ պետք չէ անել նոր բիզնես սկսելիս
Վարչապետը նշել է, որ գործարարներին համարում է կառավարության թիվ մեկ դաշնակիցը երկրի զարգացման գործում։
Հիշեցնենք, որ 2019թ-ին ՀՆԱ–ի աճը 2018թ-ի համեմատ կազմել է 7.6 տոկոս։ Փաշինյանը հույս է հայտնել, որ 2020թ–ին աճն ավելի շատ է լինելու։