Ջոնի Մելիքյանի փոխանցմամբ` սա վերջին շաբաթների ընթացքում երրորդ ակտիվ այցն է, ինչը վկայում է երկու երկրների փոխհարաբերությունների դինամիկ զարգացման մասին, իսկ քննարկվող հարցերն առնչվում են ոչ միայն երկկողմ փոխգործակցությանը, այլև տարածաշրջանային խնդիրներին, որոնց վերաբերյալ անհրաժեշտ են միասնական մոտեցումներ։
«Քանի որ կա նաև համաճարակի հնարավոր տարածման հետ կապված խնդիրը, հետևաբար, կարևոր է նաև համատեղ մոտեցումների քննարկումը, համատեղ ջանքերի ու պայքարի համադրումը, առավել ևս, որ Հայաստանը չի պատրաստվում փակել Վրաստանի հետ սահմանը։ Առհասարակ ակնկալվում է հայ-վրացական հարաբերությունների բավական ակտիվ տարի։ Նախատեսված է նաև միջկառավարական հանձնաժողովների նիստը, որի օրակարգային որոշ հարցեր հավանաբար կքննարկվեն նաև Նիկոլ Փաշինյանի կայանալիք այցի ընթացքում»,– նշում է փորձագետը։
Անդրադառնալով Վրաստանի պաշտպանության նախարար Իրակլի Ղարիբաշվիլիի վերջին այցի ընթացքում հնչած տեսակետին, թե Հայաստանը 2020թ.–ին կմասնակցի Վրաստանում կայանալիք ՆԱՏՕ–ի զորավարժություններին` Ջոնի Մելիքյանը նշում է, որ դա ոչ թե հյուսիսատլանտյան դաշինքի, այլ վրաց–ամերիկյան «Գլոբլ փարթներ» ծրագիրն է, որին մասնակցում են ինչպես ՆԱՏՕ–ի, այնպես էլ դաշինքի ոչ անդամ երկրները։ Հայաստանը նույնպես մասնակցել է այդ ձևաչափի բազմազգ զորավարժություններին, ինչն, ըստ վրացագետի, տեղավորվում է նաև հայ-վրացական համագործակցության օրակարգում, որովհետև տարածաշրջանային անվտանգությանն առնչվող որոշ հարցերում անհրաժեշտ են միասնական մոտեցումներ։ Ըստ այդմ` Հայաստանն ու Վրաստանն ունեն ընդհանուր մարտահրավերներ, ինչը մղում է սերտ համագործակցության։
Հայաստանն ու Վրաստանը ստորագրեցին 2020 թվականի ռազմական համագործակցության ծրագիրը
Ջոնի Մելիքյանը ողջունում է այն հանգամանքը, որ ներկայումս Վրաստանը նախագահում է Եվրախորհրդում։ Այդ կազմակերպությունը գնահատում է հարևան երկրում տեղի ունեցող ժողովրդավարական գործընթացները, հետևաբար վրացագետը մաղթում է, որ Վրաստանը արդյունավետորեն եզրափակի իր նախագահումը նշված կառույցում` խթանելով ժողովրդավարական բարեփոխումները։
Նշենք, որ ՀՀ վարչապետ Նիկոլ Փաշինյանը մարտի 3-4-ը պաշտոնական այցով կմեկնի Վրաստանի Հանրապետություն:
Հիշեցնենք, որ փետրվարի 27-ին երկօրյա պաշտոնական այցով Հայաստանէր եկել Վրաստանի պաշտպանության նախարար Իրակլի Ղարիբաշվիլիի գլխավորած պատվիրակությունը: Իսկ դրանից առաջ` փետրվարի 19–ին աշխատանքային այցով Վրաստանում էր ՀՀ ՊՆ գլխավոր շտաբի պետ Արտակ Դավթյանը։