Տավուշի մարզպետ Հայկ Չոբանյանը կարծում է, որ հայ-ադրբեջանական սահմանին հնչած կրակոցների առումով ոչ մի արտառոց բան չկա, սահմանային գոտում պարբերաբար լինում են որոշակի լարումներ։
«Որևէ աժիոտաժի կարիք չկա, առավելևս, որ դա կարող է վտանգավոր լինել բնակչության համար նաև ապահովության տեսանկյունից։ Անհրաժեշտ է, որ սահմանի վրա իրավիճակը լինի հանդարտ»,– ասաց մարզպետը։
Չոբանյանի խոսքով` կրակոցները եղել են հայկական դիրքերի ուղղությամբ, և ոչ թե բնակավայրերի, զինծառայողներից մեկը վիրավորվել է, բայց, բարեբախտաբար, նրա կյանքին վտանգ չի սպառնում։
Ադրբեջանական կողմն այս շաբաթ ավելի շատ կրակոցներ է արձակել Արցախի ուղղությամբ
Մարզպետը հերքել է նաև այն տեղեկությունը, որ իբր կրակոցներն են արձակվել, մասնավորապես, Կոթի գյուղի ուղղությամբ։ Ըստ նրա` բնակիչների շրջանում ամեն ինչ նորմալ է, հանգիստ վիճակ է, խուճապ չկա, որովհետև նման կրակոցները դարձել են սովորական երևույթ, իսկ եթե իրական վտանգ սպառնա, կլինեն համապատասխան միջոցառումներ։
Ավելի վաղ տեղեկացրել էինք, որ ՀՀ ՊՆ խոսնակ Արծրուն Հովհաննիսյանը Facebook-ի իր էջում գրել էր, որ երեկ ադրբեջանական ԶՈւ-ի ստորաբաժանումները կրակ են բացել ՀՀ ԶՈւ-ի ստորաբաժանումների մարտական դիրքերի ուղղությամբ: Կրակից վիրավորվել է հայ զինծառայող, վիրավորումը թեթև է, նրա կյանքին վտանգ չի սպառնում: Հայկական ԶՈւ-ի ստորաբաժանումների պատասխան կրակից հետո ադրբեջանական կրակը դադարել է։