ԵՐԵՎԱՆ, 20 փետրվարի — Sputnik. Նորածինների ապօրինի որդեգրումների գործով անցնող, հանրապետության նախկին գլխավոր մանկաբարձ–գինեկոլոգ Ռազմիկ Աբրահամյանի մեղադրանքը փոփոխվել և լրացվել է։ Sputnik Արմենիային գլխավոր դատախազության հանրային կապերի վարչության պետ Արևիկ Խաչատրյանը հայտնեց, որ Աբրահամյանին նոր մեղադրանք է առաջադրվել Քրեական օրենսգրքի 167-րդ հոդվածի 2.3-րդ մասով` ծնողներից երեխային ապօրինի բաժանելը կամ երեխային փոխելը` պաշտոնեական դիրքն օգտագործելով։
«Ծնողները ստում են, ԱԱԾ–ն շատ բան է ասում». Ռազմիկ Աբրահամյանը` կորած երեխաների մասին
«Բացի այդ, դատարանը բավարարել է նրան կալանավորելու` դատախազության միջնորդությունը, սակայն այլընտրանքային խափանման միջոց է ընտրել գրավը՝ 5 միլիոն դրամի չափով»,–ասաց Խաչատրյանը։
Հիշեցնենք՝ Հանրապետական ծննդատան տնօրեն, մանկաբարձ-գինեկոլոգ Ռազմիկ Աբրահամյանին մեղադրանք էր առաջադրվել ՀՀ քրեական օրենսգրքի 167-րդ հոդվածի 2-րդ մասի 2-րդ կետով (ծնողներից երեխային ապօրինի բաժանելը կամ երեխային փոխելը մի խումբ անձանց կողմից նախնական համաձայնությամբ,) և 200–րդ հոդվածի 3-րդ կետով (առևտրային կաշառքը)։
Նոյեմբերի 14-ին ԱԱԾ–ն հայտնել էր, որ բացահայտվել են տարբեր պաշտոնատար անձանց կողմից մանկատների երեխաների որդեգրման գործընթացում կատարված առերևույթ հանցագործություններ։ Երեխաների ապօրինի որդեգրման համար մեղադրանք է առաջադրվել երեք անձի` «Երևանի մանկան տուն» ՊՈԱԿ-ի տնօրեն Լիանա Կարապետյանին և Ռազմիկ Աբրահամյանին։
Երեխաների ապօրինի որդեգրումը բացառելու համար բուժաշխատողների հետ կրթական ծրագիր կանցկացվի