ԵՊՀ-ում այսօր Հոգաբարձուների խորհրդի նիստը չի կայացել։ Համալսարանից տեղեկացրել են` նիստը տեղի չի ունեցել, քանի որ քվորում ապահովված չի եղել:
Դավիթ Ափոյանի փոխանցմամբ`պատճառն ուսանողների բոյկոտն է, որը պայմանավորված է «Բարձրագույն կրթության և գիտության մասին» ՀՀ օրենքի նախագծով կառավարման խորհրդի կազմում ուսանող անդամների թվի կրճատման հանգամանքով։ Եթե հիմա 32 անդամներից 8-ը ուսանողներն են, ապա նոր օրենքի նախագծի համաձայն` խորհրդի կազմը պետք է բաղկացած լինի 12 հոգուց, որոնցից միայն մեկը պետք է լինի ուսանող։ Ըստ Ափոյանի`ուսանողական կառույցները բազմիցս բողոքել են այդ կապակցությամբ, սակայն նրանց ձայնը հաշվի չի առնվել, և նրանք բովանդակային հիմնավորում այդպես էլ չեն ստացել։
«Այս իրավիճակն օգտագործեցինք, որպեսզի ցույց տանք, որ կառավարության ներկայացուցիչներն այնքան էլ հետևողական չեն հոգաբարձուների խորհրդի նիստին մասնակցելու հարցում։ Եթե ուսանողները ներկա գտնվեին, նիստը կկայանար, բայց ուշադրություն դարձնենք այն հանգամանքի վրա, որ միայն ուսանողների բացակայությամբ նիստը չէր տապալվի։ Սա առաջին դեպքն է, որ բացակայել են ուսանողները, մինչդեռ կառավարության ներկայացուցիչների պարագայում սա առաջին դեպքը չէ»,– նշում է ԵՊՀ ուսխորհրդի նախագահը։
Ափոյանի հավաստմամբ` եթե քննարկվեր վճռական հարց, օրինակ` ռեկտորի ընտրություն կամ կառուցվածքային ստորաբաժանումների լուծարում, ապա քվորումն անկասկած կապահովվեր, կլիներ այլ պատկեր, որովհետև որոշումը կուղղվեր բուհն ավելի կառավարելի դարձնելուն։ Մինչդեռ այս անգամ, ըստ Ափոյանի, խնդիրն առնչվում էր համալսարանի հոգսերին, որոնց կառավարության անդամները վերաբերվեցին իմիջիայլոց։
«Այժմ ունենք հետևյալ իրավիճակը. Բուհի կառավարման խնդիրներով մտահոգված ուսանողների թիվը, որոնք ցանկանում են իրենց մասնակցությամբ օգտակար լինել համալսարանին, առաջիկա օրենքի նախագծով կրճատվում է, իսկ ովքեր գալիս են իմիջիայլոց, լոկ իրենց պարտականությունները կատարելու համար, այլ ոչ թե իրապես մտահոգված են խնդիրներով, նրանց թվաքանակը պահպանվում է»,– նշում է ԵՊՀ ուսխորհրդի նախագահը։
ԵՊՀ ուսխորհրդի նախագահին բերման ենթարկելու վերաբերյալ ծառայողական քննություն է նշանակվել
Ափոյանը հույս ունի, որ իրենց բողոքը կհասնի գործադիր և օրենսդիր իշխանություններին, և նրանք կվերանայեն խնդրահարույց դրույթը։
Նշենք, որ վերոհիշյալ նիստի օրակարգում ներառված են եղել 2018-19 ուստարում «Երևանի պետական համալսարան» հիմնադրամի գործունեության հիմնական ուղղություններով կատարված աշխատանքների վերաբերյալ ռեկտորի հաշվետվության ներկայացումն ու 2016-2020 թթ. «Երևանի պետական համալսարան» հիմնադրամի զարգացման ռազմավարական ծրագրով 2018-19 ուստարում նախատեսված աշխատանքների կատարողականի հաստատումը: