ԵՐԵՎԱՆ, 18 փետրվարի — Sputnik. Հայաստանի զինված ուժերի գլխավոր շտաբի պետ Արտակ Դավթյանն այսօր ԱԺ-ում լրագրողների հետ զրույցում հայտնեց, որ հրաժարական չի ներկայացնի։
«Չեմ պատրաստվում հրաժարական տալ»,– ասաց նա։
Այդուհանդերձ, Դավթյանը չհերքեց, որ ԶՈՒ–ում կլինեն կադրային փոփոխություններ։ Թե ինչ փոփոխությունների մասին է խոսքը, ԳՇ պետը չհստակեցրեց` նշելով, որ դրանց մասին կհայտարարվի։
Հիշեցնենք` երեկ ՀՀ վարչապետ Նիկոլ Փաշինյանի մոտ տեղի ունեցած խորհրդակցությունից հետո լուրեր տարածվեցին, որ հրաժարական են ներկայացնելու Արցախի Հանրապետության պաշտպանության նախարար, պաշտպանության բանակի հրամանատար, գեներալ-լեյտենանտ Կարեն Աբրահամյանը, ՀՀ ՊՆ ռազմական ոստիկանության պետ, գեներալ-մայոր Արթուր Բաղդասարյանը, ՀՀ ԶՈՒ անձնակազմի հետ տարվող աշխատանքների վարչության պետ, գեներալ-մայոր Ալիկ Ալեքսանյանը։
«Պարտված ենք բոլորս». ԶՈւ ԳՇ պետի հետ ԱԺ երկու հանձնաժողովները փակ քննարկում կունենան
Ըստ որոշ լուրերի` բանակում այս տարի տեղի ունեցած մահվան 13 դեպքերի պատճառով հրաժարական է ներկայացնելու նաև Արտակ Դավթյանը։
Հնարավոր հրաժարականների մասին լուրերն առայժմ ո՛չ հեքվել, ո՛չ հաստատվել են։
Նշենք, որ Արտակ Դավթյանն այսօր ԱԺ–ում փակ հանդիպման էր հրավիրվել։ Քննարկումը կազմակերպել էին Ազգային ժողովի պաշտպանության և անվտանգության հարցերի և Մարդու իրավունքների պաշտպանության և հանրային հարցերի մշտական հանձնաժողովները:
Դավիթ Տոնոյանն ու Արտակ Դավթյանը մասնակցել են մահացած զինծառայողի հուղարկավորությանը
Պատգամավորների ու շտաբի պետի քննարկմանը մասնակցել են նաև զինված ուժերի մի շարք բարձրաստիճան սպաներ: Փակ հանդիպումից հետո Դավթյանը պատասխանել է լրագրողների հարցերին: