«Չեմպիոն, միշտ առաջ». «Սպիտակ արջը» շնորհակալություն է հայտնել երկրպագուներին. լուսանկար

ԵՐԵՎԱՆ, 16 փետրվարի — Sputnik. Հունահռոմեական ըմբշամարտի օլիմպիական չեմպիոն, աշխարհի եռակի ու Եվրոպայի հնգակի չեմպիոն Արթուր Ալեքսանյանը Instagram-ի իր էջում շնորհակալություն է հայտնել հայ ժողովրդին ու իր երկրպագուներին։

«Շնորհակալ եմ շնորհավորանքների համար, կփորձեմ շարունակել ուրախացնել բոլորիդ»,-գրել է նա։

Բրոնզե մեդալի 2 հնարավորություն և 2 պարտություն. Հայաստանի ըմբիշների արդյունքները

Երկրպագուները բուռն են արձագանքել մարզիկի շնորհակալությանը։ Նրանք բազմաթիվ դրական մեկնաբանություններ են գրել ու հպարտացել, որ նման չեմպիոն ունեն։

«Մեր հպարտություն», «չեմպիոն, միշտ առաջ»,« ուժդ անսպառ»,«հրաշք տղա»,-գրել են նրանք։

Նշենք, որ Հռոմում կայացած Ըմբշամարտի Եվրոպայի առաջնությունում ոսկե մեդալ նվաճելուց հետո Արթուր Ալեքսանյանը Երևան է ժամանել փետրվարի 15–ի լույս 16-ի գիշերը։ Չնայած ուշ ժամին, Երևանի «Զվարթնոց» օդանավակայանի ժամանման սրահում հավաքվել էին բազմաթիվ մարզասերներ ու լրագրողներ։ Նրանք մեծ խանդավառությամբ դիմավորեցին ըմբշամարտի Եվրոպայի հնգակի չեմպիոն Արթուր Ալեքսանյանին։

Նշենք, որ Հռոմում անցկացվող հունահռոմեական ոճի ըմբշամարտի եզրափակչում 97 կգ քաշային կարգում Արթուր Ալեքսանյանը 7։1 հաշվով հաղթանակ տարավ Իտալիան ներկայացնող Նիկոլոզ Կախելաշվիլի դեմ։

Իտալիան ներկայացնող վրացի ըմբիշ Նիկոլոզ Կախելաշվիլին ամեն ինչ արեց ոսկե մեդալ շահելու համար: Բայց Ալեքսանյանին հաղթել հնարավոր չէր: Արթուրը հաղթեց ու Հայաստանին ոսկե երկրորդ մեդալը բերեց Եվրոպայի առաջնությունից:

Հիշեցնենք, որ Եվրոպայի առաջնությունում Արթուր Ալեքսանյանը 1/8 եզրափակիչում 5:1 հաշվով հաղթել էր թուրք Չենկ Իլդեմին, քառորդ եզրափակիչում հայ ըմբիշը ժամանակից շուտ՝ 9:0 հաշվով պարտության էր մատնել բուլղարացի Կիրիլ Միլովին, իսկ կիսաեզրափակիչում էլ «Սպիտակ արջն» իր առավելությունը ֆին Մատտի Կուսմանենի նկատմամբ արտահայտեց 8:1 հաշվով: