ԵՐԵՎԱՆ, 6 փետրվարի — Sputnik. ԱԺ–ն ավարտեց սահմանադրական փոփոխությունների նախագծի քննարկումը։ Պատգամավորների ելույթներից հետո խմբակցությունների անունից հանդես եկան նաև խմբակցությունների ղեկավարները, որոնք ներկայացրին իրենց քաղաքական ուժի հավաքական տեսակետը ներկայացված նախագծի վերաբերյալ։
ԱԺ «Բարգավաճ Հայաստան» խմբակցությունը դեմ չէ Սահմանադրական փոփոխությունների օրինագիծը հանրաքվեով ընդունելուն, բայց չի ընդունում նախագծի ներկա ձևակերպումները։ Այս մասին ԱԺ–ում, խմբակցության անունից ելույթ ունենալիս հայտարարեց պատգամավոր Միքայել Մելքումյանը։
«Այո՛, մենք շահագրգռված ենք հանրաքվեի գաղափարի մեջ, բայց մի հետաքրքիր առաջարկ ենք անում` «Բարգավաճ Հայաստան» խմբակցությունը պատրաստ է 24 ժամ դուրս չգալ այստեղից, մինչև այդ իմ ասած ընթացակարգային, գրագետ, իրավական լուծումները միասին գտնենք»,– ասաց Մելքումյանը` խորհրդարանական ընդդիմությանը խորհուրդ տալով քննարկել իր այդ առաջարկը։
Հանրաքվեի դրվելու համար սահմանադրական փոփոխությունների նախագիծը պետք է տապալվի. ինչպե՞ս
Հակառակ դեպքում, նրա խոսքով, «Բարգավաճ Հայաստան» խմբակցությունը չի կիսի ներկայացված նախագծի համար պատասխանատվությունը։
«Լուսավոր Հայաստան» խմբակցության անունից հանդես եկավ Մանե Թանդիլյանը` հայտարարելով, որ իշխող քաղաքական ուժը չի ցանկանում լսել իրենց առաջարկներն ու կարծիքները։
«Հակաօրինական պրոցեսների մեջ ներգրավել մի ամբողջ ժողովրդի դուք չեք կարող։ Մեծամասնության իրավունքները սահմանափակված են փոքրամասնության իրավունքներով»,– նշեց Թանդիլյանը։
Ընդդիմադիր գործընկերներին «Իմ քայլը» խմբակցության անունից արձագանքեց խմբակցության ղեկավար Լիլիթ Մակունցը։
Նա հայտարարեց, որ 2015թ–ի փոփոխություններից հետո այսօր գործող Սահմանադրությունը չի հստակեցնում, թե Սահմանադրական փոփոխությունների նախագծի սահմանադրականության նկատմամբ վերահսկողությունը կոնկրետ ինչ չափանիշներով ու ինչ սահմաններում պետք է իրականացվի։
«Սահմանադրությամբ սահմանվել է, որ ԱԺ–ի կողմից սահմանադրական փոփոխությունների նախագիծը առաջին ընթերցմամբ չընդունվելու դեպքում, այն դրվում է հանրաքվեի»,– ասաց նա։
ՍԴ փոփոխությունների նախագիծն ուղարկեք Վենետիկի հանձնաժողով. ԵԽԽՎ կոչը ՀՀ իշխանություններին
Մակունցը շեշտեց, որ իր ասածը ամրագրված է իրավական հիմքերով։
Քվեարկությունը նախատեսված է այս պահին հայտարարված ընդմիջումից հետո։
Ի դեպ,այս պահին խորհրդարանում է նաև Նիկոլ Փաշինյանը, որը, ամենայն հավանականությամբ, հանդես կգա ելույթով։
ԱԺ կանոնակարգ օրենքը նախատեսում է, որ ԱԺ արտահերթ նիստում ՀՀ վարչապետը կարող է ներկա լինել ու ելույթ ունենալ։