ԵՐԵՎԱՆ, 5 փետրվարի - Sputnik. Երևանի «Էրեբունի Պլազա» բիզնես կենտրոնում օրեր առաջ կրակոցներ արձակած Արթուր Թորոսյանը գտնվում է Նուբարաշենի հոգեբուժական կլինիկայում: Այս տեղեկությունը Sputnik Արմենիայի թղթակցին հայտնեց Թորոսյանի փաստաբան Էդուարդ Աղաջանյանը:
«Արթուր Թորոսյանը դատահոգեբուժական փորձաքննություն է անցնում Նուբարաշենի հոգեբուժարանում: Նա այնտեղ կմնա 10-ից 21 օր», - ասաց փաստաբանը:
Ըստ Աղաջանյանի` Թորոսյանի խոսքը, մասնավորապես որոշ հարցերի պատասխանները ստիպել են կասկածել, որ նա հոգեպես անհավասարակշիռ է: Դատաբժշկական փորձաքննությունը նշանակվել է այս շաբաթվա սկզբին: Ըստ նրա` Թորոսյանը հանգիստ է ընդունել, որ հոգեբուժական կլինիկայում իրեն փորձաքննության պետք է ենթարկեն:
Փաստաբանը տեղեկություններ չունի Թորոսյանի հնարավոր հոգեկան խնդիրների, ինչպես նաև նրա բժշկական պատմության մասին:
«Քանի դեռ Թորոսյանի դատահոգեբուժական փորձաքննության պատասխանը չկա, նա ցուցմունք տալ չի կարող։ Հարցաքննությունը կկայանա միայն փորձաքննության ավարտից հետո: Հավանաբար նա ցուցմունք կտա ոչ շուտ, քան մեկ ամսվա ընթացքում», - ասաց Աղաջանյանը:
«Էրեբունի պլազայում» կրակոցներ արձակած տղամարդը չի ընդունում իրեն առաջադրված մեղադրանքը
Հիշեցնենք` «Էրեբունի պլազա» բիզնես կենտրոնում հունվարի 23-ին կրակոցներ էին հնչել։ Ոստիկանությունը 14։40 ահազանգ էր ստացել, որ շենքում զինված անձ կա։ Անմիջապես դեպքի վայր էին մեկնել օպերատիվ խմբերը։ Կրակոցներ արձակածին վնասազերծել էին ժամը 16։00–ին։ Ավելի ուշ հայտնի դարձավ, որ կրակողն Արտաշատի բնակիչ, 32-ամյա Արթուր Թորոսյանն է։
Արթուր Թորոսյանի հետ զենքը վայր դնելու բանակցություններ էր վարել անձամբ ՀՀ ոստիկանապետի ԺՊ Արման Սարգսյանը։ Բանակցություններից հետո տղամարդը ոստիկանության պետի պաշտոնակատարի ուղեկցությամբ նրա ծառայողական մեքենայով տեղափոխվել էր ոստիկանություն։ Տուժածներ չկային։