ԵՐԵՎԱՆ, 24 հունվարի — Sputnik. ՍԴ դատավոր Հրայր Թովմասյանի փաստաբան Ամրամ Մակինյանը Facebook-ի իր էջում Թովմասյանի տանը խուզարկության ժամանակ նկարահանված տեսանյութ է հրապարակել։
«ՀՔԾ պարզաբանման մասով, թե իբր ես ապատեղեկատվություն եմ տարածում...»,– գրել է Մակինյանը։
Տեսանյութում երևում է, որ Թովմասյանի փաստաբանները ՀՔԾ քննիչից պահանջում են թույլ տալ ծանոթանալ խուզարկության վերաբերյալ դատարանի որոշմանը։
«Խնդրում եմ թույլ տալ ինձ ծանոթանալ դատարանի որոշմանը»,– ասում է փաստաբան Միհրան Պողոսյանը։
ՀՔԾ քննիչն էլ փաստաբան Ամրամ Մակինյանից պահանջում է անջատել հեռախոսը և չնկարահանել։
«Պարոն Մակինյան, անջատեք հեռախոսը։ Սա նախաքննական գաղտնիք է»,– ասում է քննիչը։
Խոսակցությունը աստիճանաբար ավելի բարձր տոնայնություն է ստանում։ Քննիչը փաստաբանին հորդորում է լռել։ Ի պատասխան Պողոսյանն ասում է. «Դուք ո՞վ եք, որ ինձ ասեք` լռեք»։
Տեսանյութն ընդհատվում է այն պահին, երբ փաստաբանները պահանջում են իրենց թույլ տալ Քրեական դատավարության օրենսգրքի համաձայն` ծանոթանալ խուզարկության մասին որոշմանը։
Ավելի վաղ հայտնել էինք, որ ՀՔԾ քննիչներն այսօր խուզարկություն են կատարում Հրայր Թովմասյանի տանը:
Թովմասյանի փաստաբանները խուզարկության ընթացքում լրագրողներին ասել էին, որ քննիչն իրենց թույլ չի տվել ծանոթանալ խուզարկության որոշմանը։ Ի պատասխան ՀՔԾ–ն հաղորդագրություն տարածեց` վստահեցնելով, որ պաշտպանական թիմին հնարավորություն է տրվել ծանոթանալու խուզարկության որոշմանը։
Հրայր Թովմասյանին մեղադրանք է առաջադրվել 2019 թվականի դեկտեմբերի 27-ին, ՀՀ քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնեական լիազորությունները չարաշահելու համար։
Ընդ որում՝ նրան որպես մեղադրյալ ներգրավելու որոշումը ՀՀ գլխավոր դատախազը կայացրել էր դեկտեմբերի 26-ին` ճիշտ այն նույն օրը, երբ ՀՀ նախագահ Արմեն Սարգսյանը ստորագրել էր Սահմանադրական դատարանի դատավորներին վաղաժամ թոշակի ուղարկելու մասին օրենքը։
Հրայր Թովմասյանը խոսել է ՀՔԾ այցելելու մասին
Հունվարի 22–ին տեղեկություն տարածվեց, որ քննիչը միջնորդություն է ներկայացրել դատարան` Հրայր Թովմասյանի հեռախոսային զանգերը գաղտնալսելու, համապատասխան բջջային օպերատորից նրա նախկին հեռախոսազանգերի վերծանումները առգրավելու վերաբերյալ:
ՀՔԾ-ն սկսել է գաղտնալսել ՍԴ նախագահ Հրայր Թովմասյանի զանգերը. ԶԼՄ