ԵՐԵՎԱՆ, 23 հունվարի — Sputnik. ՀՀ ԱԻՆ «Հիդրոմետ» ծառայության պետ Գագիկ Սուրենյանը հայտնում է, որ այսօր երեկոյան ժամերին Սև ծովից ցուրտ մթնոլորտային ճակատ է ներթափանցում հանրապետության տարածք։
Սուրենյանը Facebook սոցիալական ցանցի իր էջում գրառում է կատարել` ասելով, որ այսօր երեկոյան հանրապետության արևմտյան և կենտրոնական շրջաններում, առաջիկա գիշերը շրջանների զգալի մասում, իսկ վաղը ցերեկը, հատկապես Վայոց Ձորում, Սյունիքում և Արցախում սպասվում է ձյուն։
«Սպասվող ձյան շերտի բարձրությունը կկազմի 5-8 սմ, Լոռիում և Տավուշում 1-2 սմ։ Հունվարի 24-ի լույս 25-ի գիշերը օդի ջերմաստիճանը կնվազի 8-10 աստիճանով, սակայն հունվարի 28-ից կրկին նույնքան կբարձրանա»,–գրել է Սուրենյանը։
Նրա խոսքով` Երևանում այսօր ուշ երեկոյան կսկսվի ձյուն, որը կշարունակվի ողջ գիշեր, վաղը ցերեկը տեղումները կդադարեն։ Սպասվող ձյան շերտի բարձրությունը Երևանում կլինի 4-5 սմ։
Հիշեցնենք, որ այսօր Երևանում ցերեկային ժամերին կգրանցվի +2-ից +4, երեկոյան`0-ից +2 աստիճան տաքություն, իսկ գիշերը` -1-ից -3 աստիճան։