Շրջակա միջավայրի նախարար Էրիկ Գրիգորյանը Sputnik Արմենիայի հետ զրույցում ասաց, որ Սևանա լճի «ծաղկման» հետ կապված երկու խումբ հիմնական խնդիրներ կան, որոնցից մեկը լճի մակարդակի բարձրացումն է, մյուսը՝ Սևանա լիճ թափվող կեղտաջրերի ծավալի նվազեցումը։
«Այս խնդիրների շրջանակում մշակվել է ճանապարհային քարտեզ, որն օրեր անց կներկայացվի մեր միջազգային գործընկերներին, բացի այդ, ԵՄ-ն 5 միլիոն դոլար գումար է հատկացրել Սևանի ծրագրի համար»,-նշեց նախարարը։
Ըստ գերատեսչության ղեկավարի` այսօր մի շարք աշխատանքներ են իրականացվում․ ափամերձ տարածքների մաքրում, գույքագրում, հետազոտում։
Մարդկանց ուղղորդենք գնալ Սևան` իրենց` հավաբույն հիշեցնող օբյեկտներում հաց ուտե՞լ. Փաշինյան
«Սա մեկ տարվա լուծելիք հարց չէ։ Գերմանացի այն մասնագետները, որոնց հետ աշխատում ենք` մեզ զգուշացնում են, որ 1-2 տարվա մեջ արդյունքներ չակնկալենք, քանի որ վերականգնման գործընթացը երկար կտևի»,-ասաց Գրիգորյանը։
Պաշտոնյան արձանագրում է, որ Սևանա լճում տեղակայված ցանցավանդակային տնտեսություններից մեկն արդեն հեռացվել է, իսկ մյուսն էլ աշխատում է բավականին սահմանափակ ծավալով։ Ինչ վերաբերում է Սևանի ափամերձ տարածքների ապօրինի շենք-շինություններին, ապա, ըստ Գրիգորյանի, գույքագրված են 4800-ը, որոնցից առաջնային են մինչև 1901․5 նիշը գտնվող շինությունները։ Խոսքը, ընդհանուր առմամբ, 800-900 շինության մասին է։
Շրջակա միջավայրի նախարարը նշեց, որ առաջիկայում կառավարություն են ներկայացնելու պետական ու համայնքային սեփականության գույքի ապամոնտաժման մասին նախագիծ։
Նա նշեց, որ մասնավոր շինությունները պետք է ապամոնտաժեն դրանց սեփականատերերը, հակառակ դեպքում՝ դա կանի պետությունն ու դատարանով սեփականատիրոջից կստանա ապամոնտաժման վրա ծախսված գումարը։
Դանիելյան. «Սևանի ծաղկելը կյանքի ու մահվան սահմանին գտնվող լճի ճիչն է»