ԵՐԵՎԱՆ, 20 հունվարի – Sputnik. ՀՀ աշխատանքի և սոցիալական հարցերի նախարարությունն ահազանգեր է ստանում, որ սոցիալական տարբեր ծառայությունների դիմելիս որոշ դեպքերում քաղաքացու դիմումը չի ընդունվում, այսպես ասած՝ խրախուսում են չդիմել, բանավոր պատասխանելով՝ «չի հասնում»։ Թեմային Facebook–ի իր էջում անդրադարձել է նախարար Զարուհի Բաթոյանը։
Կառավարությունը կխթանի ծնելիության աճը. միանվագ նպաստը կբազմապատկի, հիփոթեքին կօգնի
«Հորդորում եմ սոցիալական որևէ ծառայությունից օգտվելու ձեր հայտը գրանցել գրավոր։ Դիմումի մերժումը կամ հաստատումը ևս ձեզ պետք է ներկայացվի գրավոր։ Սա օրենքի պահանջ է, որևէ այլ տեսակի պատասխան դրանից շեղում է, ուստի խախտումներ արձանագրելու դեպքում խնդրում եմ գրեք իմ կամ նախարարության ֆեյսբուքյան էջին կամ զանգահարեք թեժ գիծ՝ 114»,–գրել է ՀՀ աշխատանքի և սոցիալական հարցերի նախարար։
Նա, սակայն, նշել է, որ դիմումի առկայությունը դեռ այս կամ այն ծրագրից օգտվելու իրավունք չի ապահովում։ Դա պարզապես պայման է պետական աջակցությունից օգտվելու իրավունքը ճշտելու համար։
Նպաստառուներն աշխատանքի անցնելուց հետո 6 ամիս կշարունակեն նպաստ ստանալ, Բաթոյան
Բաթոյանը նշել է, որ դրա համար դիմումը պետք է ներկայացնել համալիր սոցիալական ծառայությունների տարածքային կենտրոն, իսկ եթե դիմողի բնակության վայրում դեռևս առկա չէ համալիր կենտրոն, ապա Աշխատանքի և սոցիալական հարցերի նախարարության ենթակայությամբ գործող սոցիալական ծառայություններ տրամադրող (զբաղվածության, սոցիալական ապահովության կամ բժշկասոցիալական փորձաքննության) կամ սոցիալական աջակցության տարածքային մարմիններին։