ԵՐԵՎԱՆ, 19 հունվարի — Sputnik. Հնարավորություն ունենալ երաժշտությամբ զբաղվել, նշանակում է կամուրջներ կառուցել, ոչ թե դրանք ավերել. նման կերպ է մեկնաբանել գերմանացի հայտնի բաս Ռենե Պապեն ադրբեջանցի տենորի վարքագիծը` Facebook սոցիալիստական ցանցի իր էջում գրում է աշխարհահռչակ օպերային երգչունի Հասմիկ Պապյանը։
Հունվարի 13–ին տեղեկություն տարածվեց, որ օպերային երգչուհի Աննա Նետրեբկոյի ամուսինը` ազգությամբ ադրբեջանցի Յուսիֆ Էյվազովը, հրաժարվել է Դրեզդենի օպերային փառատոնի բացմանը նույն բեմում ելույթ ունենալ սոպրանո Ռուզան Մանթաշյանի հետ` պատճառաբանելով երգչուհու հայ լինելը։ Հայտարարության համաձայն` համերգի կազմակերպիչները չեղարկել են հայ երգչուհու ելույթը։
«Սովորաբար ես այսպիսի երևույթները չեմ մեկնաբանում, բայց որպես ծնունդով դրեզդենցի, երաժշտության, արվեստի և ռասիզմին դեմ դեսպան` ստիպված եմ իմ հարգարժան գործընկեր Յուսիֆին ասել, որ ատելություն չբերի իմ քաղաք, կամ որևիցե մի այլ տեղ։ Սիրելի Յուսիֆ, եթե չգիտես, ապա ասեմ քեզ, որ Դրեզդենը ունի պատմական շատ պայծառ, շատ մութ և նաև փառավոր երաժշտական անցյալ»,–ասել է Պապեն։
Նրա խոսքով` Դրեզդենը կրկին իր ճանապարհն է հարթում Եվրոպայի և աշխարհի մեծագույն քաղաքներից մեկը դառնալու համար։ Ըստ Պապեի` այնտեղ երգելու և ունկնդրին երջանկացնելու հրավերը շատ մեծ պատիվ է և առավելություն:
Սա «լյա-լյա-ֆա» չէ․ ջազի աստղերն անհավանական տոն նվիրեցին հայ հասարակությանը․ լուսանկարներ
«Դու պետք է երջանիկ և հպարտ լինես նրա մի մասնիկը դառնալու համար: Դու պիտի հիշվես որպես արտիստ, ոչ թե ատելության կրող»,–ասել է նա։
Հիշեցնենք, որ փառատոնի կազմակերպիչները հայտարարություն էին տարածել` վստահեցնելով, որ Էյվազովը նման բան չի ասել, իսկ Մանթաշյանն էլ ընդհանրապես հրավիրված չի եղել փառատոնին։ SemperOpernball–ի կազմկոմիտեն նշել էր, որ, հավանաբար, հայ երգչուհուն ներկայացնող Massis Opèra ֆրանսիական համերգային գործակալության հետ թյուրըմբռնում է եղել։