ԵՐԵՎԱՆ, 13 հունվարի — Sputnik. 2019թ.-ին ՊԵԿ-ում պարգևավճարներ ստացել են բոլորը։ Այսօր լրագրողների հետ հանդիպմանը հայտարարեց ՊԵԿ նախագահ Դավիթ Անանյանը։
«Եթե մենք ուզում ենք ունենալ պրոֆեսիոնալ անձնակազմ, գոնե պետք է մասնավոր ու պետական հատվածների մրցակցությունն ապահովենք։ Մեր մասնագետներն այսօր մասնավոր հատվածի պատրաստի տնօրեններ են, գլխավոր հաշվապահներ են, աուդիտորներ են»,- ասաց նա։
Անանյանը չթաքցրեց՝ միայն անցած տարի ՊԵԿ-ից ազատվել է 967 աշխատող, որոնցից շուրջ 400-ը՝ օպտիմալացման արդյունքում, մյուսներն անցել են այլ աշխատանքի։
Այդուհանդերձ, պետական աշխատավարձերը, նրա դիտարկմամբ, պետք է լինեն հավասարակշռված։
«Մենք չպիտի ունենանք այնպիսի աշխատավարձեր, որ սոցիալական բում առաջանա, բայց մենք պիտի ունենանք գոնե այնպիսի աշխատավարձեր, որպեսզի պետական աշխատողը կոռուպցիայի մասին չմտածի»,- ասաց Անանյանը։
Քաղաքապետը կրկին պարգևատրել է աշխատակիցներին. ծախսվել է ավելի քան 65 մլն դրամ
Հիշեցնենք` 2018թ.–ի տարեվերջին ՊԵԿ–ում միլիոնավոր դոլարների հասնող պարգևատրումների թեման լայն քննարկման առիթ էր դարձել հանրության շրջանում։
Չնայած դրան, 2019թ.–ին կառավարությունը 2.3 միլիարդ դրամով ավելացրեց ՊԵԿ–ի` 2019 թվականի պարգևատրման ֆոնդը:
Վարչապետը պետական ծառայողներին այս կերպ խրախուսելը որակեց որպես հակակոռուպցիոն քայլ։