Բալային համակարգի ներդրման և համակարգչային վերահսկման պայմաններում զգալիորեն կնվազեն նաև նախկինում մարդկային գործոնով պայմանավորված կոռուպցիոն ռիսկերը: Sputnik Արմենիայի հետ զրույցում այս մասին ասում է Սերգեյ Ղահրամանյանը։
«Բազմաթիվ ու բազմաժանր խնդիրները չեն կարող լուծվել միայն այս փոփոխություններով, որովհետև երթևեկության կազմակերպման ու վերահսկման ուղղությամբ դեռ պետք է կատարվեն հսկայական աշխատանքներ, այդուհանդերձ, բալային համակարգի ներդրմամբ կարող է վճռվել՝ վարորդներն ապագայում կվարեն մեքենա, թե ոչ»,- նշում է ոստիկանության պետին կից հասարակական խորհրդի անդամը:
Զրույցի ընթացքում Սերգեյ Ղահրամանյանը ներկայացնում է վիճակագրական տվյալներ, որոնց համաձայն` նախորդ տարվա նույն ժամանակահատվածի համեմատ այս տարվա տոնական օրերին ՃՏՊ-ների քանակը գրեթե կրկնակի նվազել է։
Ղահրամանյանն անդրադառնում է նաև խախտումների թեմային և ասում, թե ինչպես է գործելու ծանուցման համակարգը, որպեսզի վարորդները լինեն իրազեկված ու խնդիրների չբախվեն։
Հիշեցնենք` 2020 թվականի հունվարի 1-ից Հայաստանում ուժի մեջ է մտել տուգանային միավորների նոր համակարգը, ըստ որի՝ տրված 9 բալը սպառելու դեպքում վարորդը վեց ամսով զրկվելու է վարելու իրավունքից։
«Հիմա մի քիչ զգույշ ենք քշում». ՀՀ քաղաքացիները՝ բալային համակարգի մասին. տեսանյութ