ԵՐԵՎԱՆ, 11 հունվարի – Sputnik. Երեկ Հայաստանում Ա H1N1 գրիպից մահանալու դեպք է արձանագրվել։ Այս մասին հայտնում է ՀՀ առողջապահության նախարարության մամուլի ծառայությունը։
«Լաբորատոր հետազոտությունների արդյունքում հաստատվել է գրիպի Ա H1N1 ենթատեսակը: Դեպքի համաճարակաբանական հետազոտության արդյունքում պարզվել է, որ հիվանդը բժշկական օգնության է դիմել ծայրահեղ ծանր վիճակում, շնչահեղձությամբ՝ հիվանդության 10-րդ օրը»,– նշված է հաղորդագրության մեջ:
Sputnik Արմենիայի տեղեկություններով` գրիպից մահացած քաղաքացին մեծահասակ կին է։ ՀՀ–ից վերջին շրջանում չի բացակայել, վարակվել է Հայաստանում։ Հիվանդանոց շատ ուշ է դիմել, երբ նրան փրկելու հույս այլևս չի եղել։ Մահն արձանագրվել է Երևանի բազմապրոֆիլ հիվանդանոցներից մեկում։
Նախարարությունը հայտնում է նաև, որ հանրապետությունում դեռևս նախորդ տարվա դեկտեմբերից շրջանառում են գրիպի Ա H1N1 և Բ տեսակները, ինչպես նաև շնչառական այլ վարակների հարուցիչներ (ռինովիրուս, բոկավիրուս, ռեսպիրատոր սինտիցիալ վիրուս, ադենովիրոս):
Հաղորդագրության մեջ նշվում է նաև, որ Հայաստանում սուր շնչառական վարակներով հիվանդացության դեպքեր շատ կան, բայց դրանք նախորդ տարվա համեմատ նվազել են, մասնավորապես՝ 2020 թվականի հունվարի 11-ի դրությամբ 1.2 անգամ նվազել է սուր շնչառական վարակներով պոլիկլինիկական կազմակերպություններ դիմելիությունը, 1.7 անգամ նվազել են նաև թոքաբորբերով հոսպիտալացումները:
Այսօր հանրապետության բժշկական կազմակերպություններում, սուր շնչառական վարակներով հոսպիտալացված է 668 հիվանդ (նախորդ տարվա համեմատ նվազում՝ 1,1 անգամ), որի 97,9%-ը կազմում են 0-18 տարեկան երեխաները: Հիվանդների դիմելիության հիմնական բեռը բաժին է ընկել Երևան քաղաքի մանկական ստացիոնարներին: Բոլոր հիվանդները ստանում են համապատասխան բուժում, ունեն լավացման դրական շարժընթաց: Բժշկական կազմակերպությունների վերակենդանացման բաժանմունքներում բուժում է ստանում 31 հիվանդ (նախորդ տարվա 50-ի փոխարեն), որոնց մեծամասնությունը կազմում են 0-5 տարեկան երեխաները:
Իրականացվում է նաև ջերմային ռեժիմի սահմանված ցուցանիշների պահպանման դիտարկում կրթական կազմակերպություններում։ Հունվարի 10-ի դրությամբ շեղումներ արձանագրվել են 153 դպրոցում և 25 մանկապարտեզում:
Հրավառության «գինը». 10–ամյա Տավրոսը հույս ունի, որ կորցրած ցուցամատը հետո կվերականգնվի
Գրիպով չհիվանդանալու, ինչպես նաև հետգրիպային բարդություններից խուսափելու լավագույն միջոցը պատվաստումն է։
Նախարարությունը հիշեցնում է, որ հանրապետության բոլոր պոլիկլինիկաներն ապահովված են սեզոնային գրիպի պատվաստանյութով, և բոլոր նրանք, ովքեր դեռ սեզոնային գրիպի դեմ պատվաստում չեն ստացել, կարող են դիմել իրենց հաշվառման պոլիկլինիկա և պատվաստվել: Պատվաստումները կատարվում են կամավորության սկզբունքով, անվճար, պետական պատվերի շրջանակում։
Ո՞րն էր «Դալմա գարդեն մոլում» արտակարգ իրավիճակի պատճառը. մասնագիտական կարծիքներ