Հայաստանի ներքաղաքական օրակարգը նախորդ տարվանից փոխանցվել է նոր տարվան։ Sputnik Արմենիայի հետ զրույցում այս մասին ասաց քաղաքագետ Սուրեն Սուրենյանցը։
«Ամենամեծ մարտահրավերը կապված է դատական իշխանության հետ, այսինքն՝ այն գործընթացների, որոնք տեղի են ունենում քաղաքական իշխանության շուրջ»,-կարծում է Սուրենյանցը։
Նրա խոսքով` ակնհայտ է, որ իշխանությունը դատական համակարգն առողջացնելու ռացիոնալ լուծումներ չունի։
«Համենայն դեպս, տարին սկսում ենք ՍԴ անդամների վաղ կենսաթոշակի ուղարկելու օրենքի կիրարկմամբ, որը նույնիսկ կոռուպցիոն ռիսկի տարրեր է պարունակում։ Իմ կարծիքով` թե՛ իշխանությունը չունի դատական համակարգը բարեփոխելու տեսլական, թե՛ դատական իշխանությունն ինքը չի պատկերացնում, թե ինչպիսի ուղենիշներով պետք է շարունակի գործունեությունը նոր Հայաստանում»,-ասում է քաղաքագետը։
Բադալյան. «Հայաստանում անկախ դատական համակարգ այդպես էլ չկայացավ»
Սուրենյանցը հույս է հայտնում, որ իր վերջո բոլորը կհանգեն այն հիմնարար թեզին, որ դատական բարեփոխումների լավագույն տարբերակը սահմանադրական բարեփոխումների իրականացումն է։
Ինչ վերաբերում է Հայաստանի տնտեսությանը, ապա Սուրենյանցը կարծում է, որ ամենամեծ մարտահրավերն իշխանությունների առջև՝ ներդրումների ապահովումն է։
Արտաքին քաղաքականության տեսանկյունից` քաղաքագետը կարևորում է ԱՄՆ-Իրան հակամարտության պատճառով տարածաշրջանում ստեղծված իրավիճակին Հայաստանի զգոն և հավասարակշռված արձագանքը։