«Մեկը բոլորի ու բոլորը մեկի համար»․այսպիսին է Երևանի շտապօգնության հինգերորդ ենթակայանի կարգախոսը։ Աշխատանքային օրերին օրական մոտ 700 կանչ է լինում, ամեն ենթակայան առավելագույնը հարյուր կանչ է ստանում։ Ամանորի օրերին կանչերի թիվը հասնում է 1000-ի, բնականաբար, ենթակայաններն ավելի ծանրաբեռնված են աշխատում։
Հինգերորդ ենթակայանն արդեն իր ավանդույթներն ունի։ Այստեղ «մշտական հաճախորդների» ցանկ կա՝ անհրաժեշտ բոլոր տվյալներով։ Որպես կանոն դա խրոնիկական հիվանդություն ունեցողներն են, իսկ տվյալները պետք են բլանկը լրացնելու ու արագ արձագանքման համար։
Հեռախոսավար Նվարդ Մարտիրոսյանն ընդունում է զանգերն ու տեղեկությունը փոխանցում հերթապահ բժիշկներին։
Նա ասում է, որ Ամանորին ամենաշատը զանգում են թունավորումների, երեխաների մրսածության ու ճնշման հետ կապված խնդիրների պատճառով։
«Օրը սկսվում և ավարտվում է կանչերով։ Եթե Ամանորի գիշերն ահազանգեր չեն լինում, աշխատում ենք շնորհավորել միմյանց ու բարեմաղթանքներ ասել։ Մասնավորապես, առողջություն ենք մաղթում», - նշում է Նվարդը։
Բուժքույր Գայանե Բադալյանը բազմիցս հերթապահել է Ամանորի գիշերը։ Տներում նրանց հաճախ են հրավիրում սեղանի շուրջ, ուզում են հյուրասիրել։ Որպես կանոն բժիշկները հրաժարվում են, քանի որ պետք է ռացիոնալ օգտագործեն ժամանակը։
Օրբելյան, Մանուկյան և Ալլա․ մի հայն ուղի բացեց Պուգաչովայի համար, մյուսն ուզում էր «փակել»
Իսկ ահա բժիշկ Հայկ Հովսեփյանը նախընտրում է չհերթապահել Նոր տարվա գիշերը, բայց դրան հաջորդող օրերին էլ են սեղանի մոտ հրավիրում։ Ոմանք առաջարկում են մի բաժակ խմել տոների կապակցությամբ, սակայն բժիշկը մերժում է։ Իսկ ոչ աշխատանքային ժամերին նախընտրում է տնական օղի, բայց սահմանափակ քանակությամբ։ Քաղաքացիներին էլ է խորհուրդ տալիս ալկոհոլը չչարաշահել։
Ինչպես խուսափել շմոլ գազից և օգնել թունավորվածին. ԱԻՆ–ի հայտարարությունը
Նշենք՝ շտապօգնության բժիշկը մեկ հերթապահության համար 20 հազար դրամ է ստանում, բուժքույրը` 10,5 հազար, իսկ վարորդը` 10 հազար։ Բժիշկներն ամսական 6–7 հերթապահություն են ունենում (մեկ հաստիք) կամ 3–4 հերթապահություն (կես հաստիք)։ Ստացվում է` ամբողջական հաստիքով աշխատող բժիշկն ամսական 140 հազար դրամ աշխատավարձ է ստանում։
Մինչ նախորդ տարվա օգոստոս Երևանում շտապօգնության 38 բրիգադ էր գործում, այսօր դրանց թիվը հասել է 53–ի։ Հետևաբար նրանց աշխատանքը թեթևացել է։