ԵՐԵՎԱՆ, 3 հունվարի — Sputnik. Մերձավորարևելյան տարածաշրջանում ծավալվող իրադարձությունների կապակցությամբ ՀՀ արտգործնախարար Զոհրաբ Մնացականյանը խորհրդակցություն է հրավիրել։ Facebook-ի պաշտոնական էջում այս մասին հայտնում է ՀՀ ԱԳՆ մամուլի խոսնակ Աննա Նաղդալյանը։
Ըստ հաղորդագրության` խորհրդակցությանը մասնակցել են նաև տարածաշրջանի երկրներում հավատարմագրված ՀՀ դեսպանները:
Ի դեպ, մինչ այդ ՀՀ վարչապետը Facebook-ում հայտնել էր, որ ՀՀ համապատասխան ինստիտուտներն ի վիճակի են հետևել իրավիճակին, վերլուծել զարգացումները, անհրաժեշտության դեպքում իրականացնել իրավիճակից բխող քայլեր։
Նրա խոսքով` բոլոր հանձնարարականները տրված են: Իսկ տնայնագործ գեոպոլիտիկներին, որոնք ուզում են խուճապ տարածել, Փաշինյանը խորհուրդ էր տվել «հանգիստ նստել տեղները»։
Բանն այն է, որ Իրանի և ԱՄՆ–ի հարաբերությունների լարումը հայաստանցի փորձագետներն արդեն իսկ որակել են Հայաստանի համար վտանգավոր թե՛ քաղաքական և թե՛ տնտեսական առումով։
Հիշեցնենք` հունվարի 3-ին, ամերիկյան ուժերը հրթիռակոծել են Իրաքի մայրաքաղաքի օդանավակայանի տարածքը։ Ըստ պաշտոնական հաղորդագրության` հարվածներն ուղղված են եղել մի քանի թիրախի, որոնց թվում են եղել նաև օդանավակայանի կողքով անցնող ավտոմեքենաները։ Դրանցից մեկում գտնվել է Իսլամական հեղափոխության պահապանների կորպուսի (ԻՀՊԿ) «Կուդս» հատուկ ստորաբաժանման հրամանատար, ԻԻՀ գեներալ Ղասեմ Սոլեյմանիին, որը մահացել է։
Պենտագոնը պաշտոնապես հայտարարել է, որ այդ ռազմական գործողությունն իրականացվել է ԱՄՆ նախագահ Դոնալդ Թրամփի կարգադրությամբ` «արտերկրում ԱՄՆ անձնակազմի պաշտպանության նպատակով»։
Որտեղ է սպանվել իրանցի գեներալը. համացանցում լուսանկարներ են հայտնվել
Իրանն արդեն դաժան վրեժ է խոստացել ԱՄՆ–ին։ Իրանի արտաքին գործերի նախարար Մոհամմադ Ջավադ Զարիֆը, Twitter–ում մեկնաբանելով Իրաքում ԱՄՆ գործողությունը, այն անվանել է ԱՄՆ-ի կողմից «միջազգային ահաբեկչական ակտ» և «հիմար էսկալացիա»:
Ինչ հետևանքներ կունենա իրանցի գեներալի սպանությունը Հայաստանի ու տարածաշրջանի համար