ԵՐԵՎԱՆ, 30 դեկտեմբերի – Sputnik. Երևանում 42 երթուղին սպասարկող «Գազել» մակնիշի ավտոմեքենան դուրս է եկել հանդիպակաց երթևեկելի գոտի և բախվել փայտե էկեկտրասյանը։ Այս մասին հայտնում է shamshyan.com-ը:
Դեպքը տեղի է ունեցել այսօր` դեկտեմբերի 30-ին, Վանցյան փողոցում։
Ըստ կայքի` վթարի հետևանքով վարորդն ու 4 ուղևորներ մարմնական վնասվածքներով տեղափոխվել են «Աստղիկ» բժշկական կենտրոն, որտեղ վիրավորներից մեկը գիտակցության չգալով՝ մահացել է:
Առողջապահության նախարարության մամուլի ծառայությունն էլ հայտնում է, որ մահացածը վարորդն է։ Ըստ նախարարության տարածած հաղորդագրության` «Աստղիկ» բժշկական կենտրոն տեղափոխվածները ստացել են առաջին բուժօգնություն, այժմ անցնում են հետազոտություններ, բոլորի վիճակը գնահատվում է միջին ծանրության:
Նշված երթուղայինն աշխատում է Հարավ-արևմտյան թաղամաս–«Գրանդ Սպորտ» երթուղով:
Հիշեցնենք, որ այս նույն երթուղին սպասարկող մեկ այլ «Գազել» բեռնատարին էր բախվել այս տարվա մարտին։