ԵՐԵՎԱՆ, 25 դեկտեմբերի — Sputnik. «Լույս» խմբակցության ղեկավար Դավիթ Խաժակյանն այսօր` դեկտեմբերի 25–ին, Երևանի ավագանու նիստի մեկնարկին ներողություն խնդրեց իր գործընկերներից` «Հանրապետություն» կուսակցության անդամներ Թեհմինա Վարդանյանից ու Անի Խաչատրյանից` նախորդ շաբաթվա քննարկումների ժամանակ առաջացած տարաձայնությունների համար: Նա շեշտեց, որ ավագանու նիստի հանդարտ անցնելը մեծ մասամբ կախված է քաղաքապետ Հայկ Մարությանի ջանքերից։
Խաժակյան. «Պետք է պարզել՝ ինչ ընթացակարգով են շրջանցել ավագանու որոշումը»
«Նախորդ շաբաթ քննարկվում էր ԼՀԿ–ի կողմից Երևանի ավագանուց իմ հետկանչման հարցը: Ես շարունակելու եմ իմ աշխատանքն այստեղ, և քանի որ բանավեճն անցել էր հրապարակային դաշտ, ես ու «Լույս» խմբակցության իմ գործընկերները հրապարակային ֆորմատով էինք քննարկումներ անցկացրել: Ուզում եմ ներողամտություն հայցել իմ գործընկերներից բոլոր այն հնարավոր ձևակերպումների հետ կապված, որոնք կարող էին տարաձայնության տեղիք տալ, և ուզում եմ ասել, որ ավագանու նիստի հանդարտ անցնելը պայմանավորված է Ձեզանով, պարոն քաղաքապետ, և հուսով եմ, որ մեր կոնստրուկտիվ հունը նաև Ձեր ջանքերով կվերականգնվի», - ասաց Խաժակյանը:
Հիշեցնենք` Երևանի ավագանու դեկտեմբերի 16–ի նիստի ժամանակ ավագանու «Լույս» խմբակցության ղեկավար Դավիթ Խաժակյանը հայտարարեց, որ Երևանի քաղաքապետարանում տեղի է ունեցել պաշտոնեական կեղծիք, և դա պետք է դառնա դատախազության քննության առարկա։
Դավիթ Խաժակյանը հրավիրվել է ոստիկանություն` բացատրություն տալու
«Այսօր ստացել եմ քաղաքապետի կարգադրությունը՝ Հայկ Մարությանին արձակուրդ տրամադրելու մասին, որով լիազորությունները վերապահվում էր նաև քաղաքապետի տեղակալ Հայկ Սարգսյանին: Տեղի է ունեցել պաշտոնեական կեղծիք` հետին ամսաթվով՝ հոկտեմբերի 17-ով լրացվել է փաստաթուղթ, որն իրականում գրվել է նոյեմբերի 4-ին»,–ասաց Խաժակյանը։
Նա հավաստիացրեց, որ իր մոտ է գտնվում իրական, այսինքն` հետին ամսաթվով` նոյեմբերի 4-ով լրացված փաստաթղթի պատճենը։
Ավելի վաղ Խաժակյանը Գլխավոր դատախազին հանցագործության մասին հաղորդում էր ներկայացրել, որտեղ, մասնավորապես, նշել էր, որ ս.թ. հոկտեմբերի 22-ից նոյեմբերի 8-ը Հայկ Մարությանը գտնվել է արձակուրդում, որի ժամանակ նրա լիազորությունները զբաղեցրել է քաղաքապետի առաջին տեղակալ, քաղաքապետի պաշտոնակատար Հրաչյա Սարգսյանը, սակայն քաղաքապետի որոշմամբ` Սարգսյանը նոյեմբերի 5-ից 13-ը գործուղվել է արտասահման։ Սարգսյանին փոխարինել է քաղաքապետի տեղակալ Հայկ Սարգսյանը։ Վերջինս հիշյալ ժամանակահատվածում ավելի քան 7 տասնյակ փաստաթղթեր է ստորագրել` չունենալով այդ լիազորությունները։
Հիմք ընդունելով այս ամենը, Խաժակյանը պահանջում էր, որ փոխքաղաքապետ Հայկ Սարգսյանն ու Հայկ Մարությանը պատասխանատվության ենթարկվեն` պաշտոնեական լիազորությունները չարաշահելու համար։
Խաժակյանը նաև պատրաստակամություն էր հայտնել աջակցել քննությանը և մատնանշել բազմաթիվ այլ հանգամանքներ։
Դեկտեմբերի 17-ին «Լուսավոր Հայաստան» կուսակցության նախագահ Էդմոն Մարուքյանը և փոխնախագահ Մանե Թանդիլյանը հայտարարել էին, որ, հիմնվելով քաղաքացիների արձագանքների վրա և ելնելով մի շարք այլ հանգամանքներից, ԼՀԿ կառավարման խորհուրդը քննարկում է Երևանի ավագանու կազմում իր մասնակցության շարունակության և ավագանու կազմից իր միակ անդամ Դավիթ Խաժակյանին հետ կանչելու հարցը:
«Նման ճոխություն թույլ չեմ տա քաղաքային իշխանությանը». Խաժակյանը` իր հետագա քայլերի մասին
Դեկտեմբերի 23–ին «Լուսավոր Հայաստան» կուսակցության կառավարման խորհուրդը հայտարարություն տարածեց, որ Դավիթ Խաժակյանը կշարունակի մնալ Երևանի ավագանու կազմում։