ԵՐԵՎԱՆ, 25 դեկտեմբերի — Sputnik. Արժույթի միջազգային հիմնադրամը (ԱՄՀ) հերթական անգամ հանդես է եկել Հայաստանի կառավարության վարած տնտեսական քաղաքականության բարձր գնահատականով: Այս մասին Facebook-ի իր էջում գրել է ՀՀ վարչապետ Նիկոլ Փաշինյանը։
«Լուրջ ներդրողներն, ի դեպ, առաջնորդվում են առաջին հերթին հենց նմանատիպ գնահատականներով: Հետևաբար, այսօրինակ հայտարարությունները կարևոր են Հայաստանի ներդրումային գրավչությունն ավելացնելու համար»,– գրում է վարչապետը։
Նիկոլ Փաշինյանի գրառումը վերաբերում է ԱՄՀ Գործադիր խորհրդի դեկտեմբերի 20-ին ավարտած «Սթենդ-Բայ» վարկային պայմանավորվածության շրջանակում Հայաստանի Հանրապետության կատարողականի առաջին ամփոփմանը։
3-ամյա այս վարկային ծրագիրը՝ մոտ 248.2 միլիոն ԱՄՆ դոլար ֆինանսավորմամբ համարժեք է ԱՄՀ-ում Հայաստանի քվոտայի 139.75 տոկոսին։
Ինչպես հայտնում է ՀՀ Կենտրոնական բանկն այդ մասին տարածած հաղորդագրության մեջ, Հայաստանի իշխանությունները շարունակում են «Սթենդ-Բայ» վարկային պայմանավորվածությունը մինչև դրա ավարտը՝ 2021 թ. մայիսի 16-ը, դիտարկել որպես նախազգուշական և մտադիր չեն այն օգտագործել, եթե չնախատեսված տնտեսական ցնցումների հետևանքով վճարային հաշվեկշռի հետ կապված խնդիրներ չառաջանան:
Ո՞ւր է գնում ՀՀ տնտեսությունը. տնտեսագետ Կառլեն Խաչատրյանը գնաճ ու թանկացում է կանխատեսում
ԿԲ–ն նաև փոխանցում է, որ Արժույթի միջազգային հիմնադրամի տնօրենի տեղակալ և նախագահի պաշտոնակատար Միթսուհիրո Ֆուրուսավան իր հայտարարության մեջ ասել է, որ Հայաստանի տնտեսական ցուցանիշներն ուժեղ են «առողջ աճով, ցածր գնաճով, կայուն ֆինանսական համակարգով և բարելավվող արտաքին ու հարկային բուֆերներով»:
«Պետական պարտքը շարունակում է մնալ նվազող հետագծի վրա, և ակնկալվում է, որ Հայաստանն իր միջնաժամկետ պարտքի թիրախին կհասնի սպասվածից մի քանի տարի շուտ»,– ասել է նա` հույս հայտնելով, որ այդ հանգամանքը հնարավորություն է տալիս արագացնել բարեփոխումներին ուղղված ջանքերը։
Հայաստանը բենզին կգնի Ղազախստանից
ԱՄՀ ղեկավարի համոզմամբ` ՀՀ իշխանությունների բարեփոխումների օրակարգի իրականացումը կնպաստի կայուն և ներառական աճին:
ԱՄՀ–ն կարևորել է նաև կառավարության ջանքերը` ուղղված կոռուպցիայի դեմ պայքարին, սոցիալական ապահովության ցանցի ընդլայնմանն ու խոցելի խավերին պաշտպանելու իրենց հանձնառությանը, մարդկային կապիտալի ամրապնդմանն ու կանանց աշխատուժի մասնակցության բարձրացմանը։