ԵՐԵՎԱՆ, 23 դեկտեմբերի — Sputnik. Հայաստանի ֆուտբոլի ֆեդերացիայի նոր նախագահ Արմեն Մելիքբեկյանը բացառում է, որ իտալական «Ռոմայի» և Հայաստանի հավաքականի կիսապաշտպան Հենրիխ Մխիթարյանին չհրավիրեն ազգային հավաքական նրա մոր` ՀՖՖ գործկոմի նախկին անդամ Մարինա Թաշչյանի հետ ունեցած տարաձայնության պատճառով։ Մելիքբեկյանն այս մասին հայտնեց ասուլիսի ժամանակ։
«Հնարավոր չէ նման բան։ Նախ` իմ մտքով նման բան նույնիսկ չէր անցնի։ Երկրորդ` Հայաստանի հավաքականի կազմը հաստատում է գլխավոր մարզիչը, պարզապես չեմ պատկերացնում, որ ինչ–որ մարզիչ Հենրիխ Մխիթարյանին թիմ չհրավիրի, չէ՞ որ նա լեգենդար ֆուտբոլիստ է և հայկական ֆուտբոլի հպարտությունը։ Նա հանդես է գալիս մեր երկրի դրոշի ներքո, ոչ թե խաղում է հանուն նախագահի, գլխավոր քարտուղարի կամ ֆեդերացիայի աշխատակիցների», – ասաց Մելիքբեկյանը։
Հիշեցնենք, որ Արմեն Մելիքբեկյանը Հայաստանի ֆուտբոլի ֆեդերացիայի նախագահ ընտրվեց այսօր։ Այդ պաշտոնի համար պայքարում էր նաև «Լոռի» ակումբի հիմնադիր, ՀՖՖ գործկոմի անդամ Թովմաս Գրիգորյանը։ ՀՖՖ նախագահի պաշտոնին առաջադրված երրորդ թեկնածուն՝ ԽՍՀՄ հավաքականի նախկին անդամ, լեգենդար ֆուտբոլիստ Խորեն Հովհաննիսյանը, ավելի վաղ հայտարարել էր, որ դուրս է գալիս պայքարից և սատարելու է Արմեն Մելիքբեկյանին։
Հանրահայտ ֆուտբոլիստ Հենրիխ Մխիթարյանի մայրը` Մարինա Թաշչյանը, որն ավելի քան մեկ տասնամյակ աշխատում է Հայաստանի ֆուտբոլի ֆեդերացիայում և մի քանի ընտրություններում նաև ՀՖՖ գործկոմի անդամ էր ընտրվել, այսօր դուրս մնաց գործկոմի անդամների ցուցակից և ընտրություններից հետո չկարողացավ զսպել զայրույթը:
«Այսքան տարի է` ես աշխատում եմ ֆուտբոլում, և կարելի է ասել, որ կյանքիս հիմնական մասը ֆուտբոլում եմ անցկացրել, նման խայտառակ ընտրություններ չեմ տեսել: Ամեն ինչ պլանավորված ու ծրագրված էր, ու արեցին այն, ինչ ուզում էին: Կոնկրետ իմ դեմ հատուկ աշխատանք էր տարվել, որպեսզի ես չհայտնվեմ ՀՖՖ գործկոմում: Երևի ես իրենց խանգարում էի»,- ասաց նա:
Ըստ Թաշչյանի` խոսակցություններ են եղել, որ Հենրիխին չպետք է հրավիրեն հավաքական։