Գյուղատնտեսական ապրանքի Հայաստանի խոշորագույն մեծածախ շուկաներից մեկը գտնվում է Արմավիրի մարզում։ Ժողովուրդն այդ շուկան անվանում է «Մեյմանդար»։ Աշխատանքն այստեղ եռում է առավոտյան 6–ից և տևում մինչև ուշ գիշեր։ Ամեն օր այստեղ Հայաստանից, Վրաստանից, Իրանից և Թուրքիայից տոննաներով միրգ ու բանջարեղեն են վաճառում։ Նոր տարվա նախաշեմին, բնականաբար, գնորդների թիվը կտրուկ ավելանում է։
Վրաստանից մրգավաճառ Ռոլանդը պատմում է, որ Հայաստան է եկել դեկտեմբերի կեսերին։ Ամեն օր նա ստանում է ֆուռերով ուղարկված մանդարին ու արագ վաճառում դրանք։ Վստահեցնում է, որ Վրաստանում ամենահամեղ ցիտրուսներն աճում են Աջարիայում, որտեղից էլ ստանում է դրանք։ Վաճառողը մտադիր է Հայաստանում աշխատել մինչև դեկտեմբերի 30-ը և այդ օրը միայն վերադառնալ տուն։
«Ամանորը պետք է տանը դիմավորել` մանդարինի հոտով ու ջերմ մթնոլորտում», - ասում է նա:
Հայաստանցի մրգավաճառ Էդիկը նույնպես շուկա կգա մինչև դեկտեմբերի 30-ը։ Նա ամեն օր 10-12 արկղ մանդարին է վաճառում։ Շատ չէ, բայց նա հույս ունի, որ տոներին մոտ գնորդների թիվը կավելանա։
Իսկ Գուրգենն ապրում է այսօրվա օրով, նա հետաքրքիր մարքեթինգային պլան է հորինել։ Նա իր ունեցած մանդարինները բաժանել է տոնականի և սովորականի, և բնականաբար, սահմանել տարբեր գներ:
Ի դեպ, այս շուկայում մանդարին կարելի է գնել 200-500 դրամով։
Համազգային ուրախություն. վառվեցին հանրապետության գլխավոր տոնածառի լույսերը. տեսանյութ